Mámleketti bilimli, pidayı hám kúsh-ǵayratlı insanlar rawajlandıradı. Ózbekstanda barlıq reformalar hám rejeler xalqımızdıń talap hám usınıslarına súyenedi.

Endi bunıń ushın qolaylı imkaniyat bar – “Keleshek ushın” forumı perspektivalı baslamalar qaratılatuǵın ashıq sóylesiw maydanı. Onıń tiykarǵı maqseti taraw hám aymaqlardı rawajlandırıwǵa jámiyetshilikti tartıw, xalıqtıń usınısların júzege shıǵarıw, reformalardıń xalıqshıllıǵın támiyinlew bolıp esaplanadı.
Forum Ózbekstan Respublikası Prezidentiniń 2025-jıl 14-iyuldegi “Reformalardı ámelge asırıwda perspektivalı baslamalardı jáne de qollap-quwatlaw boyınsha qosımsha ilajlar haqqında”ǵı pármanına muwapıq ótkeriledi. Bunıń ushın juwapker shólkemler menen birgelikte sistema jolǵa qoyıldı, kelajakuchun.gov.uz kraud-platforması iske qosıldı.
Forum 3 basqıshtan ibarat. Birinshi basqıshta intakerler, sonıń ishinde, sırt eldegi watanlaslarımız usı kraud-platformaǵa kirip, One-ID arqalı dizimnen ótedi. 5 tiykarǵı baǵdardan birewin tańlap, usınısları hám joybarlarınıń mazmunın jazadı. Platformada hár bir puqara 5 ke shekem baslama jiberiwi hám jámáát bolıp qatnasıwı múmkin.
Ekinshi basqıshta barlıq jiberilgen baslamalar ekspertler tárepinen úyrenip shıǵıladı, olardıń usınısı tiykarında jetilistiriledi. Juwmaǵında eń áhmiyetli dep tabılǵan baslama hám ideyalar keyingi basqıshqa ótedi.
Úshinshi basqıshta avtorlar óz baslamaların Mentorlar keńesi ekspertlerine tanıstıradı. Dodalawlarda eń áhmiyetli dep tabılǵan baslamalar “Top-50” hám “Top-10” túrinde saylap alınadı.
Forumnıń juwmaqlawshı basqıshı Tashkent qalasında ótkeriledi. Onıń sánesi hám anıq ornı haqqında qosımsha xabar beriledi.
Jeńimpaz dep tabılǵan 10 eń aldıńǵı baslama Ózbekstan Respublikası Prezidentine tanıstırıladı. Juwmaǵında maqullanǵan baslamalar turmısqa engiziledi. Olardıń avtorları materiallıq xoshametlenedi, joybarları mámleket tárepinen qollap-quwatlanadı.
Tańlap alınǵan baslamalardı kommerciyalastırıw hám qarjılandırıwǵa Biznesti rawajlandırıw banki hám basqa kommerciyalıq bankler, ilimdi qarjılandırıw hám innovaciyalardı qollap-quwatlaw qorınıń qarjıları baǵdarlanadı.
Forumǵa kelip túsken basqa baslamalar mámleketlik baǵdarlamalar, tarmaq yamasa aymaqlar boyınsha “jol kartaları”n qáliplestiriw ushın Húkimet tárepinen kórip shıǵıladı. Forum sheńberinde barlıq processler Strategiyalıq rawajlanıw hám reformalar agentligi tárepinen muwapıqlastırıp barıladı.
Forumda qatnasıp, mámleketimizdiń rawajlanıwı ushın óz usınısıńızdı jiberiń! Áyne Siziń baslamańız jeńimpaz dep tabılıwı múmkin.

ÓzA