Prezident Shavkat Mirziyoev Jizzaq wálayatına saparı sheńberinde Sharaf Rashidov rayonındaǵı “Agrooray” awıl xojalıǵı kárxanaları kompleksinde de boldı.

Elimizde awıl xojalıǵın rawajlandırıwǵa qaratılıp atırǵan itibar sebepli tarawda imkaniyatlar keńeyip, zúráátlilikti arttırıwda úlken áhmiyetke iye bolmaqta. Orınlarda agrooraylar shólkemlestirilip, fermer hám diyqanlarǵa kompleksli xızmet kórsetiw jolǵa qoyılmaqta.
Jizzaq wálayatınıń Sharap Rashidov rayonında da áne, usınday oray jumıs basladı.
Orayda ósimliklerdi qorǵaw laboratoriyası, veterinariya dárixanası, agronom másláhát, tuqım hám náller jetkerip beriw, xalıqtıń shańaraqlarına ıssıxanalar qurıw, agromarket dúkanı, mini-texnikalar satıw hám olarǵa xızmet kórsetiw sıyaqlı baǵdarlar bar.
Bul jerde awıl xojalıǵı boyınsha barlıq xızmetler “bir ayna” principi tiykarında jolǵa qoyılǵan. Bir gektar maydandı qamtıp alǵan oraydıń birinshi qabatında ósimliklerdi qorǵaw quralları dúkanı, veterinariya dárixanası, tuqım dúkanı, agromarket, mobil brigada xanaları hám 8 basqa da xızmet bólmeleri jaylasqan.
Ekinshi qabatta ósimliklerdi qorǵaw laboratoriyası bar. Sonday-aq, topıraq hám suw analizi xanası, entomologiya jáne fitopatologiya xanaları shólkemlestirilgen.
Oray aymaǵında wálayatlıq awıl xojalıǵı basqarması, Agrosanaattı rawajlandırıw agentliginiń bólimi, agroinspekciya, tuqımgershilik orayı, qarakólshilik associaciyası hám awıl xojalıǵına xızmet kórsetiwshi basqa da shólkemler jaylasqan.
Mámleketimiz basshısı agrooray jumısı menen tanıstı, oraydıń jumısın bunnan bılay da keńeytiw, qarıydarlarǵa xızmetlerdi kóbeytiw hám awıl xojalıǵında qosımsha qun jaratıw boyınsha usınısların berdi.

ÓzA