Ózbekstan Respublikası Oliy Majlisi Nızamshılıq palatasındaǵı “Adolat” SDP frakciyasınıń aǵzası Nodira Rashidova xalıqtıń sociallıq turmısın úyreniw hám mámleketimizde alıp barılıp atırǵan reformalar menen tanısıw maqsetinde, respublikamızdıń bir neshe aymaqlarında boldı.

Sonıń ishinde, deputat Qaraqalpaqstan boylap úyreniwlerdi Nókis qalasındaǵı Jayhun hám Amanlıq gúzarı mákan puqaralar jıyını puqaraları menen ushırasıwdan basladı. Máhállelerdegi úyreniwleri dawamında puqaralardan kelip túsken múrájatlar tiykarında Jayhun MPJdaǵı «Jańadárya» kóshesi 94-jayda jasawshı Bekbosın Tlepov hám Amanlıq gúzarı MPJdaǵı «Tilekles» kóshesi 16-jayda jasawshı Gúlsara Tańsıqovalardıń shańaraqlarında boldı.
Bul xojalıq iyeleri bir neshe jıllardan berli termit zıyankesine qarsı gúresip kelmekte. Málim bolıwınsha, termit zıyankesi usı máhállelerdegi basqa da xojalıqlarda ushıraspaqta. Mashqalanı saplastırıw ilajların kóriw boyınsha tiyisli taraw qánigelerin tartıw, bul shańaraqlarǵa ámeldegi nızamlar sheńberinde jergilikli hákimlik tárepinen járdemler kórsetiw máselesin deputat óz qadaǵalawına alatuǵının málim etti.
Bunnan keyin, termit zıyankesine baylanıslı mashqalalardı tereń úyreniw maqsetinde deputat Nodira Rashidova Qaraqalpaqstan Respublikası hám Xorezm wálayatınıń jetekshi qánigeleri hám ilimpazları menen onlayn ushırasıw ótkerdi.
Sáwbetlesiw dawamında termitlerdiń tarqalıwı, olar keltiriwi múmkin bolǵan zıyan, sonday-aq, máhállelerde olardı joq etiw hám aldın alıwdıń nátiyjeli usılları dodalandı. Qánigeler zıyankesti saplastırıw boyınsha anıq usınıslar berdi hám bul processte puqaralar, máhálle belsendileri hám juwapker shólkemlerdiń óz-ara birge islesiwi áhmiyetli ekeni atap ótildi.
Sonday-aq, deputat Ámiwdárya hám Ellikqala rayonlarında boldı. Sapar etiw sheńberinde Bayawıl MPJda bolıp, deputat máhálle jetiligi menen ushırastı hám máhállelerde ámelge asırılıp atırǵan jumıslar, sociallıq taraw obektleri hám xalıq penen alıp barılıp atırǵan jumıslar menen tanıstı hám “Korrupciyaǵa qarsı gúresiw” boyınsha islenip atırǵan jumıslar, xalıqtı jumıs penen bánt etiw, toy-merekeler máseleleri boyınsha sáwbetlesti.
Sonday-aq, deputat usı rayonlarǵa saparı dawamında rayonlıq medicina birlespelerinde bolıp, xalıqtıń salamatlıǵın saqlaw baǵdarında jaratılǵan qolaylıqlar, sońǵı hám zamanagóy medicina mákemeleriniń medicinalıq buyımlar menen támiyinlengenlik jaǵdayın úyrendi. Xalıqtıń salamatlıǵın saqlaw baǵdarında belgilengen tiykarǵı wazıypalar, sonday-aq, hayal-qızlardıń salamatlıǵın saqlaw baǵdarında alıp barılıp atırǵan nátiyjeli reformalardıń nátiyjesi menen tanıstı.
Ellikqala máhállesinde puqaralar menen sóylesiw dawamında “Gender teńligi hám zorlıqqa qarsı gúresiw” jáne “Korrupciyaǵa qarsı gúresiw” baǵdarında ámelge asırılıp atırǵan ilajlar, xalıqtı jumıs penen támiyinlew, jańa bántlik imkaniyatların jaratıw máseleleri hár tárepleme dodalandı.
Ushırasıwlarda Ózbekstan Respublikası Prezidentiniń “Kámbaǵallıqtan abadanlıqqa qaray” PP-330-sanlı pármanı tiykarında olardı qıynap kiyatırǵan máselelerge sheshim tabıw hám olardı saplastırıw, jáne de xalıqtıń bántligin támiyinlewge qaratılǵan máseleler boyınsha sáwbetlesip, máhálle baslıǵı menen jumıssızlıqtı saplastırıw boyınsha máseleler kórip shıǵıldı.
“Konstituciya – meniń kóz aldımda” súreni astında oqıwshılar arasında ótkerilgen viktorinada qatnasqan deputat mektep oqıwshıları menen jaqınnan pikirlesti. Ilajdıń maqseti jaslarda huqıqıy bilimlerdi bekkemlew, Konstituciyaǵa húrmet hám sadıqlıq sezimin arttırıw jáne olardıń huqıqıy mádeniyatın joqarılatıwdan ibarat boldı.
Viktorina dawamında oqıwshılar mámleketimiz Konstituciyasına baylanıslı sorawlarǵa juwap berdi, óz bilim hám belsendiligin kórsetti. Jeńimpaz hám belsendi qatnasıwshılar shólkemlestiriwshiler tárepinen estelik sawǵaları menen sıylıqlandı.
Sonıń menen birge, ushırasıwda jaslarǵa Konstituciyanıń jámiyet rawajlanıwdaǵı ornı, puqaralardıń huqıqları menen erkinliklerin kepillewdegi áhmiyeti, hár bir insan ómirinde tutqan ornı haqqında túsinikler berildi.

Adilbay Orazov,
Qaraqalpaqstan xabar agentligi sholıwshı