Berdaq atındaǵı Qaraqalpaq mámleketlik universitetinde Ózbekstan Respublikası Joqarı bilimlendiriw, ilim hám innovaciyalar ministrliginiń 2024-jıl 27-dekabrdegi qararı menen Qaraqalpaq tili hám ádebiyatı qánigeliginiń 90 jıllıǵına baǵıshlanıp «Házirgi qaraqalpaq filologiyasınıń áhmiyetli máseleleri» atamasında xalıqaralıq ilimiy-teoriyalıq konferenciya ótkeriliwi belgilengen edi. Búgin oqıw dárgayında Qaraqalpaq tili hám ádebiyatı qánigeliginiń 90 jıllıǵına baǵıshlanǵan ilimiy teoriyalıq konferenciya sheńberinde “Ilham hám sóz qúdireti” atamasındaǵı Respublikalıq tańlaw jeńimpazların sıylıqlaw máresimi bolıp ótti.

Ilajda universitet rektorı wazıypasın atqarıwshı O.Dúysenbaev shıǵıp sóylep, jıynalǵanlardı Qaraqalpaq tili hám ádebiyatı qánigeliginiń 90 jıllıǵı menen qutlıqlap, fakultettiń oqıw orında ayrıqsha ornı bar ekenligi hám belgili ilimpazlar, pedagog kadrlar bul dárgayda miynet etip, olardan bilim alǵan qanshadan-qansha student jaslar belgili qánigeler bolıp jetisip shıqqanlıǵın atap ótti. Bunnan soń Túrkiya, Ázerbayjan, Qazaqstan, Rossiya, Túrkmenstan, Qırǵızstan respublikalarınan konferenciyaǵa qatnasıw ushın kelgen miymanlarǵa kókirek nıshanlar menen sawǵalar tapsırıldı.
Bunnan soń konferenciya sheńberinde shólkemlestirilgen “Ilham hám sóz qúdireti” atamasındaǵı Respublikalıq tańlawı jeńimpazları sıylıqlanıp, olarǵa diplom, statutetka hám bahalı sawǵalar tapsırıldı.
-Qaraqalpaq tili hám ádebiyatı qánigeliginiń 90 jıllıq merekesi bul tek ǵana oqıw ornı hám bul ilajǵa qatnasıwshılardıń emes al, pútkil qaraqalpaq xalqınıń bayramı. Sebebi, qaraqalpaq tili hám ádebiyatı bul xalqımızdıń Ana tili hám bay ádebiy miyrası degen sóz. Konferenciyaǵa bir neshe mámleketlerden belgili ilimpazlardıń qatnasıwı bul qaraqalpaq tili hám ádebiyatına bolǵan olardıń húrmetin, itibarın bildiredi. Bul konferenciyanıń 1-dekabr- Qaraqalpaq tiline mámleketlik til biyligi berilgen kún qarsańında ótkeriliwi de júdá orınlı bolıp, ilaj bayram menen ulasıp ketedi. Bayram bárshege qutlı múbárek bolsın ,-deydi tańlawdıń Esse janrı boyınsha birinshi orın iyesi Qaraqalpaqstan xalıq shayırı X.Dáwletnazarov.
Ilaj universitettiń «Húrliman» xalıq ansambli aǵzalarınıń atqarıwındaǵı koncert baǵdarlaması menen dawam etti.

G.Turdıshova,
Qaraqalpaqstan xabar agentligi