Usı jıldıń 27-noyabr kúni Ózbekstan Respublikası hám Litva arasındaǵı birge islesiw boyınsha parlamentleraralıq toparlardıń birinshi májilisi ótkerildi.

Atap ótilgenindey, Ózbekstan hám Litva arasındaǵı diplomatiyalıq qatnasıqlar bekkem tariyxıy tiykarlarǵa iye hám óz-ara húrmet hám isenim principleri tiykarında bekkemlenip barmaqta.
Ilajda parlament aǵzaları Ózbekstan menen Litva arasındaǵı kóp qırlı qatnasıqlar, ásirese, sawda-ekonomikalıq hám investiciyalıq tarawlardı bunnan bılay da rawajlandırıwǵa itibar qarattı.
Búgingi kúnde Litvada úsh ózbek sawda úyi, Ózbekstanda da Litva investorlarınıń qatnasıwında 30 dan aslam kompaniyalar jumıs alıp barmaqta. Litva hám Ózbekstan arasındaǵı sawda aylanısı 600 mln AQSh dollarınan artqanı atap ótildi.
Bunnan tısqarı, eki mámleket arasında mádeniy-gumanitarlıq tarawdaǵı birge islesiw de rawajlanıp, bilimlendiriw, ilim, texnologiya, mádeniyat hám kórkem óner tarawlarında bul ayqın kórinedi.
Eki tárepleme kóp qırlı birge islesiwdi, atap aytqanda, awıl hám suw xojalıǵı tarawlarındaǵı baylanıslar, ekonomikalıq hám investiciyalıq joybarlardı keńeytiw jáne aymaqlararalıq birge islesiwdi rawajlandırıw, doslıq baylanısların ornatıwda parlament járdem kórsetiwine itibar qaratıldı.
Májilis juwmaǵında birgeliktegi baslamalardıń ámeliy orınlanıwın támiyinlew maqsetinde parlamentleraralıq sóylesiwdi jedellestiriwge kelisip alındı.

Qaraqalpaqstan xabar agentligi