Ózbekstanda gúz máwsimi jawın-shashınsız ótip atırǵanı, kelesi kúnlerde de jawın-shashın bolıwı kútilmey atırǵanı sebepli muftiydiń baslaması menen, 28-noyabr kúni juma namazınan keyin – Ózbekstandaǵı barlıq meshitlerde “jawın sorap, jámáát penen eki rakat namaz oqıladı.”

Sonday-aq, wálayatlar, rayon-qalalar oraylıq meshitleri hám zıyarat orınlarında mallar soyılıp, járdemge mútáj shańaraqlar, jetim-jesirlerge, baǵıwshısın joǵaltqan kekselerge tarqatıladı.
Bunnan tısqarı, ÓMU qaramaǵındaǵı Joqarı hám orta arnawlı islam bilimlendiriw mákemeleriniń ustaz hám studentleri tárepinen Imam Buxariy “Sahihi Buxariy” shıǵarması usı jılı 28-noyabr kúni juma namazına shekem xatm etiledi (oqıp shıǵıladı).
“Negizinde, Imam Buxariydiń “Sahih”leri qurǵaqshılıqta oqılǵanda, Allah taalanıń qálewi menen jawın jawǵanı tariyx kitaplarında jazılǵan,” – delinedi ÓMU xabarında.
Basqarma Mekke hám Madinada umra zıyaratında bolıp turǵan eliwbası imamlarǵa Eki Háremde óz toparları qatnasıwında namaz oqıwdı usınıs etedi,- dep málimleme beredi xabar.uz saytı.

Qaraqalpaqstan xabar agentligi