Usı jıldıń 19-noyabr kúni Prezidenttiń “Ózbekstan Respublikasında turaq jay hám ipoteka bazarın turaqlı rawajlandırıw ilajları haqqında”ǵı pármanı qabıl etildi.

Párman menen, 2040-jılǵa shekem hár jılı qurılıp atırǵan turaq jaylardıń sanın eki esege arttırıp, 421 mıńǵa alıp shıǵıw, ipoteka kredit portfelin 10 eseden zıyat kóbeytken halda 56,7 milliard AQSh dollarına jetkeriw belgilengen.
Hújjet penen turaq jay tarawın turaqlı hám teń salmaqlı rawajlandırıwdıń tiykarǵı baǵdarları belgilendi.
Sonıń ishinde, xalıqtıń turaq jay sharayatların jaqsılaw hám “Jańa Ózbekstan” massivlerin qurıw jumısların izbe-iz dawam ettirgen halda turaq jay fondında zamanagóy turaq jaylardıń úlesin 2040-jılǵa shekem 50 procentke jetkeriw jáne turaq jay bazarına bank qarjısı hám institucionallıq investorlardıń qarjıların, sonıń ishinde, ipoteka kreditinen paydalanǵan halda tartıw sıyaqlı baǵdarlar belgilendi.
Pármanǵa muwapıq:
– Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarları;
– Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarları boyınsha maqsetli kórsetkishler;
– Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarların ámelge asırıw boyınsha kompleksli ilajlar tastıyıqlandı.
Atap ótiliwinshe, Tiykarǵı baǵdarlar urbanizaciya, turaq jay hám ipoteka bazarın 2040-jılǵa shekem rawajlandırıw tarawındaǵı mámleketlik siyasattı ámelge asırıwdıń tiykarı bolıp, bul tarawda islep shıǵılatuǵın barlıq jańa normativlik-huqıqıy hújjetler oǵan muwapıq bolıwı kerek, – dep málimleme beredi xabar.uz saytı.

Qaraqalpaqstan xabar agentligi