Ózbekstan Respublikası Prezidentiniń qararı

Ózbekstan Respublikası Prezidentiniń 2025-jıl 18-noyabrdegi “Ekologiya hám turizm tarawlarında xalıqtıń talaplarına jedel juwap bere alatuǵın basqarıw sistemasın jaratıw ilajları haqqında”ǵı PP-217-sanlı Pármanına muwapıq, ekonomikanıń strategiyalıq jaqtan áhmiyetli sektorı sıpatında turizm tarawınıń sistemalı hám turaqlı rawajlanıwın támiyinlew, tarawda mámleketlik basqarıwdı bunnan bılay da jetilistiriw, kórsetiletuǵın xızmetlerdiń sapasın arttırıw jáne milliy turistlik ónimlerdiń jáhán bazarında básekige shıdamlılıǵın támiyinlew maqsetinde qarar etemen:

I. Maqsetler.

Tómendegiler 2030-jılǵa shekem turizm tarawın rawajlandırıwdıń tiykarǵı maqsetleri etip belgilensin:

(a) turizm tarawınıń jalpı ishki ónimdegi úlesin ámeldegi 3,5 procentten 7 procentke jetkeriw;

(b) sırt el turistleriniń jıllıq sanın ámeldegi 10 mln nan 20 mln ǵa shekem jetkeriw, sonıń ishinde, tólew qábileti joqarı bolǵan turistler aǵımın kóbeytiw;

(v) turizm xızmetleriniń jıllıq eksport kólemin 6 mlrd AQSh dollarınan arttırıw;

(g) Ózbekstannıń turistlik qalaları arasında transport baylanısın jaqsılaw, ishki aviaqatnawlar sanın kóbeytiw hám de jolǵa jumsalatuǵın waqıttı keminde 3 esege qısqartıw;

(d) 4 hám 5 juldızlı miymanxanalar sanın 2 esege arttırıw;

(j) turistlik xizmetler hám ónimlerdi diversifikaciyalaw arqalı respublikanıń turistlik potencialın tolıq iske túsiriw;

(z) dúnyada keńnen tanılǵan Ózbekstannıń turistlik brendin jaratıw hám milliy turistlik ónimlerdi ǵalaba en jaydırıw ushın jańa instrumentlerdi engiziw.

II. Tarawda mámleketlik basqarıwdı jetilistiriw
Tómendegiler:

(a) Ózbekstan Respublikası Turizm komiteti jumısınıń tiykarǵı baǵdarları 1-qosımshaǵa muwapıq;

(b) Ózbekstan Respublikası Turizm komitetiniń shólkemlestiriw strukturası 2-qosımshaǵa muwapıq tastıyıqlansın.

Tómendegiler:

(a) Ózbekstan Respublikası Turizm komiteti (keyingi orınlarda – Komitet) turizm tarawın tártipke salıw hám rawajlandırıw boyınsha mámleketlik siyasattı ámelge asırıwshı respublikalıq atqarıwshı hákimiyat uyımı esaplanatuǵını;

(b) Komitet óz wákillikleri sheńberinde ulıwma májbúriy bolǵan normativlik huqıqıy aktler qabıl etiwge haqılı ekenligi;

(v) Komitet baslıǵı:

(I) belgilengen tártipte Ózbekstan Respublikası Prezidenti tárepinen lawazımǵa tayınlanatuǵını hám lawazımınan bosatılatuǵını;

(II) Komitet hám onıń sistemasındaǵı shólkemlerdiń jumısın durıs hám nátiyjeli shólkemlestiriw, sol arqalı olardıń jumısın nátiyjelilikke baǵdarlaw, sonday-aq, usı baǵdarda belgilengen maqsetli kórsetkishlerge sózsiz hám tolıq erisiwdi támiyinlewge jeke juwapker esaplanatuǵını;

(g) Komitet Ekologiya, qorshaǵan ortalıqtı qorǵaw hám klimat ózgeriwi ministrligi janındaǵı Turizm komitetiniń huqıq hám minnetlemeleri boyınsha miyrasxorı esaplanatuǵını belgilep qoyılsın.

III. Turistlik aǵımdı arttırıw

Milliy turistlik ónimlerdi jáhánde ǵalaba en jaydırıw maqsetinde:

(a) Komitet baslıǵınıń milliy turistlik ónimlerdi ǵalaba en jaydırıw boyınsha orınbasarı lawazımı kirgizilsin;

(b) Komitettiń sırt ellerdegi wákilxanaları (keyingi orınlarda – wákilxanalar) 3-qosımshaǵa muwapıq shólkemlestirilsin;

(v) wákilxanalar ózi jumıs alıp baratuǵın mámleketlerde 4-qosımshada názerde tutılǵan wazıypalardı orınlawı belgilensin;

(g) Komitet baslıǵınıń milliy turistlik ónimlerdi ǵalaba en jaydırıw boyınsha orınbasarı “Milliy PR-orayı” mámleketlik mákemesi hám wákilxanalardıń jumısın muwapıqlastırıw jáne milliy turistlik ónimlerdiń nátiyjeli marketingi ushın jeke juwapker etip belgilensin.

Komitet:

(a) Sırtqı isler ministrligi, Transport ministrligi hám basqa da mápdar ministrlikler hám uyımlar menen birgelikte eki ay múddette:

(I) Ózbekstan Respublikası aymaǵına kiriw ushın vizasız rejim engiziletuǵın mámleketler dizimin keńeytiw, Ózbekstan Respublikası aymaǵına kiriw hám onıń aymaǵında bolıwǵa baylanıslı tártip-qaǵıydalardı ápiwayılastırıw;

(II) respublikanıń turizm-transport logistikasın rawajlandırıw boyınsha puqta islengen usınıslardı;

(b) Strategiyalıq rawajlanıw hám reformalar agentligi menen birgelikte 2026-jıl 1-martqa shekem Ózbekstan Respublikası turizm tarawın 2040-jılǵa shekem rawajlandırıw strategiyası joybarın;

(v) Sanlı texnologiyalar ministrligi jáne Ekonomika hám qarjı ministrligi menen birgelikte 2026-jıl 1-aprelge shekem Ministrler Kabinetine tómendegilerdi názerde tutatuǵın 2030-jılǵa shekem mólsherlengen turistlik xızmetler bazarlarında marketing strategiyası joybarın kirgizsin:

(I) milliy turistlik ónimlerdi jedel sayaxat etiwshi xalqına iye shet mámleketlerde ǵalaba en jaydırıw;

(II) turizm tarawında maqsetli reklama sistemasın keńnen engiziw.

Mádeniyat hám kórkem ónerdi rawajlandırıw qorı Mádeniy miyras agentligi, Komitet penen birgelikte turistlerdi tartıw boyınsha qosımsha imkaniyatlardı iske qosıw maqsetinde 2026-2028-jıllarda tómendegi joybar hám ilajlardı ámelge asırsın:

(a) Samarqand qalasındaǵı eń áhmiyetli tariyxıy obektlerdi baylanıstırıwshı 6,6 km uzınlıqtaǵı turistlik marshruttı shólkemlestiriw boyınsha “Samarqandtıń miyras jolı” joybarın;

(b) xalıqtıń turmıs tárizi, sawda hám xızmet kórsetiw shaqapshaları hám kommunikaciya sistemasın tariyxıy ortalıq penen úylestirgen halda Xiywa qalasındaǵı Iyshan-qala kompleksin dúnyada birden-bir bolǵan immersiv hám “aqıllı” muzey-qalaǵa aylandırıw;

(v) Tashkent qalası boyınsha:

(I) modernizm esteliklerin YuNESKOnıń Pútkil jer júzilik miyrası dizimine kirgiziw boyınsha materiallar usınıw;

(II) eń kóp mozaikalar bar qala sıpatında jáhán kóleminde tán alınıwına erisiw.

Investiciyalar, sanaat hám sawda ministrligi Komitet hám jergilikli mámleketlik hákimiyat uyımları menen birgelikte tómendegi tártipte dúnyaǵa belgili kiyim-kenshek brendlerin sawda-kewilashar komplekslerge tartıw jáne qalalardıń shetlerinde (qala átiraplarında) milliy arxitekturalıq usılǵa tiykarlanǵan zamanagóy autlet orayların shólkemlestiriw ilajların kórsin:

(a) birinshi basqıshta (2030-jılǵa shekem) – Tashkent, Samarqand, Buxara hám Xiywa qalalarında;

(b) ekinshi basqıshta (2030-jıldan baslap) – turistlik potencialı joqarı bolǵan basqa elatlı punktlerde.

IV. Turizm tarawın mámleket tárepinen qollap-quwatlaw
Sonday tártip ornatılsın, oǵan muwapıq:

(a) 2026-jıl 1-fevraldan baslap sırt el puqaraları tárepinen Ózbekstan Respublikası aymaǵınan shıǵıp ketiwde aldın satıp alınǵan tovarlar ushın tólengen qosımsha qun salıǵı summasınıń qaytarılıwı olardıń qálewine bola naq pul túrinde ámelge asırılıwı múmkin;

(b) 2026-jıl 1-marttan baslap Turizmdi qollap-quwatlaw qorı (keyingi orınlarda – Qor) qarjıları esabınan:

(I) turistlik startaplardı – jańa túrdegi turizm xızmetlerin islep shıǵıp, ámeliyatqa engiziwge baylanıslı qárejetlerdiń 50 procenti, biraq 1 mlrd sumnan kóp bolmaǵan muǵdarda hár jılı eń jaqsı 10 joybarǵa shekem subsidiyalar ajıratıladı;

(II) miymanxanalardıń Ministrler Kabineti tárepinen tastıyıqlanatuǵın dizimde názerde tutılǵan xalıqaralıq tán alınǵan “jasıl” sertifikatlardı alıwǵa baylanıslı qárejetleriniń 50 procenti qaplap beriledi;

(v) 2026-jıl 1-aprelden baslap xalıqaralıq konferenciyalar hám ilajlardı (MICE turizm) shólkemlestirip, oǵan keminde 100 sırt el turistti tartqan isbilermenlik subektlerine usı ilajlardı shólkemlestiriwde olar tárepinen tólengen qosımsha qun salıǵı summalarınıń 50 procentin qaytarıw tártibi engiziledi;

(g) 2027-jıl 1-yanvarǵa shekem usı qararǵa 5-qosımshada názerde tutılǵan tártipke ámel etken halda:

(I) turizm tarawı subektleri tárepinen import etiletuǵın avtobus, elektrobus hám mikroavtobuslar bajıxana bajısınan azat etiledi;

(II) Qaraqalpaqstan Respublikasında dizimnen ótip, licenziyaǵa iye bolǵan turoperatorlarǵa, burınǵısınan basqasha tárizde, ekstremal túrlerdi shólkemlestiriw ushın dvigatel kólemi 2,4 litrden kem bolmaǵan joqarı ótiw qábiletine iye transport quralların import etiwde bajıxana bajı hám utilizaciya jıyımın ámeldegi stavkanıń 25 procenti muǵdarında 3 jıl múddetke bólip-bólip tólewge ruqsat etiledi;

(III) turizm tarawı subektleri tárepinen import etiletuǵın avtobus, elektrobus hám mikroavtobuslardıń sanına qaramastan, olarǵa bir sertifikat beriwge ruqsat etiledi;

(d) 2030-jıl 1-yanvarǵa shekem  “Brand Finance” kompaniyasınıń top-50 reytingine kiretuǵın brendti tartqan halda brend penen dáslepki kelisimlerge iye miymanxana qurılısın baslaǵan isbilermenlik subektleri miymanxananı qurıw hám úskenelewde usı brendtiń talabına muwapıq alıp kelinetuǵın ásbap-úskeneler, texnika, transport quralları, mebel hám inventarlar ushın bajıxana bajısın tólewden azat etiledi.

Tómendegiler:

(a) Komitet respublika aymaǵında óz filmlerin jaratıwda sırt el kinokompaniyalarına qárejetlerdiń bir bólegin qaytarıwdı (Rebate) muwapıqlastırıwshı juwapker mámleketlik uyım esaplanatuǵını;

(b) usı bánttiń “a” kishi bántinde názerde tutılǵan qárejetler summası:

(I) 3 milliard sumǵa shekem bolsa – 10 procent;

(II) 3 milliard sumnan 5 milliard sumǵa shekem bolsa – 15 procent;

(III) 5 milliard sumnan 10 milliard sumǵa shekem bolsa – 20 procent;

(IV) 10 milliard sumnan artıq bolsa – 25 procent, biraq bir film ushın 4 milliard sumnan aspaǵan muǵdarda Mámleketlik byudjet qarjıları esabınan qaplap beriletuǵını;

(v) 2026-jıl 1-marttan baslap abıraylı sırt el kinokompaniyaları menen sóylesiwler ótkergen halda Qor qarjıları esabınan filmlerdiń tikkeley yamasa tikkeley emes Ózbekstan Respublikasınıń turistlik tartımlılıǵı, tariyxıy-mádeniy miyrası hám basqa da áhmiyetli unamlı táreplerin kórsetetuǵın bólegin (epizodın) jaratıw ushın (sonıń ishinde, Ózbekstan Respublikası aymaǵında, óz pavilonlarında yamasa kompyuter grafikası járdeminde) haqı tólew tártibi engiziletuǵını belgilep qoyılsın.

V. Turizm tarawın sanlastırıw
Sonday tártip ornatılsın, oǵan muwapıq 2026-jıl 1-iyulden baslap:

(a) iske túsiriletuǵın milliy turizm birden-bir platforması hám onıń mobil qosımshası arqalı:

(I) sırt el turistleriniń razılıǵı tiykarında Mámleket shegarasın kesip ótiwde jıynalatuǵın maǵlıwmatlardı integraciya etken halda turistlik elektron SIM-karta menen jalǵaw hám waqtınsha bolıw ornı boyınsha dizimge alıw proaktiv túrde ámelge asırıladı;

(II) múlkshilik formasına qaramastan transporttıń barlıq túrleri integraciyalanǵan halda sayaxat baǵdarın dúziw, eń maqul baǵdar hám transport túrin tańlaw, biletlerdi onlayn bánt etiw hám satıp alıw imkaniyatı jaratıladı;

(III) bilet xojalıǵı engizilgen barlıq turizm obektleri, sonıń ishinde, muzeyler, mádeniy miyras obektleri, mádeniyat, kewilashar hám dem alıw obektlerine biletlerdi onlayn satıp alıw imkaniyatına iye bolǵan birden-bir bilet sisteması engiziledi;

(IV) ekskursiyalar ótkeriw ushın interaktiv kartalar, planshetler, audio járdemshisi, video járdemshisi hám onlayn translyaciyalar arqalı turistlik obektler haqqında málimleme beriw imkaniyatın beriwshi sanlı gid sisteması iske túsiriledi;

(v) jaylastırıw quralları tárepinen sırt elli hám jergilikli turistlerden óndiriletuǵın turistlik (miymanxana) jıyım billing sisteması arqalı avtomatikalıq tárizde tikkeley Qorǵa ótkeriledi;

(b) xalıq tárepinen dala háwlilerin ijaraǵa beriw “Soliq”  mobil qosımshası arqalı “meniń menen birge” túrinde bir shaxs atına birge dem alıwshılar sanın kórsetken halda ápiwayılastırılǵan tártipte rásmiylestiriw arqalı ámelge asırıladı.

2026-jıldıń aqırına shekem milliy turizm birden-bir platforması sheńberinde “Qáwipsiz qala” apparat-programmalıq kompleksi menen integraciyalasqan halda respublika aymaqlarına turistler aǵımların (kategoriyalarǵa qarap) hám olardıń tileklerin tallaw, personallastırılǵan marshrutlar hám usınıslardı jaratıw, sonday-aq, bahanıń qáliplesiwi hám resurslardıń bólistiriliwi sıyaqlı imkaniyatlardı názerde tutatuǵın jasalma intellekt hám úlken kólemdegi maǵlıwmatlardı tallaw sisteması engizilsin.
VI. Tarawda kadrlardı qayta tayarlaw hám olardıń mamanlıǵın arttırıw sistemasın jetilistiriw

Turizm xızmetleriniń sapasın arttırıw maqsetinde Dúnya júzilik turizm shólkeminiń qáwenderliginde Xalıqaralıq turizm akademiyasınıń Samarqand kampusında turizm tarawı subektleri xızmetkerleriniń mamanlıǵın arttırıw (1 ayǵa shekem) hám olardı qayta tayarlaw (8 ayǵa shekem) oqıw kursları shólkemlestirilsin.

VII. Qordıń qárejetlerin optimallastırıw

2026-jıl 1-yanvardan baslap:

(a) Qordıń keńesi dúzilip, onıń unamlı qararı bolmaǵan joybarlardı qarjılandırıw byudjet hám smeta-shtat tártibin buzıw esaplanadı, Ózbekstan Respublikası Prezidentiniń hújjetlerinde Qordıń qarjıları esabınan qarjılandırılıwı belgilengen joybarlar hám de Komitetti, sonıń ishinde, onıń sistemalı shólkemlerin hám aymaqlıq bólimlerin saqlaw menen baylanıslı qárejetler buǵan kirmeydi;

(b) Qordıń qarjıları esabınan qarjılandırılatuǵın joybarlardıń nátiyjeliligi Qordıń keńesi tárepinen turaqlı túrde bahalap barıladı;

(v) Ishki isler ministrligi janındaǵı Qáwipsiz turizmdi támiyinlew qorına turistlik (miymanxana) jıyımnan kelip túsetuǵın túsimlerden ótkeriletuǵın qarjı muǵdarı ámeldegi 10 procentten 5 procentke azaytıladı.

Komitet Ekonomika hám qarjı ministrligi menen birgelikte bir ay múddette Qor derekleri esabınan ministrlikler hám uyımlarǵa ajıratpalardı biykarlaw boyınsha Ózbekstan Respublikası Prezidenti Administraciyasına usınıs kirgizsin.

VIII. Qarardıń orınlanıwın shólkemlestiriw, támiyinlew hám qadaǵalaw

Turizmdi jedel rawajlandırıw hám bul tarawda mámleketlik basqarıwdı jetilistiriw boyınsha “jol kartası” 6-qosımshaǵa muwapıq tastıyıqlansın.

Ózbekstan Respublikası Prezidenti Administraciyası Kreativ ekonomika hám turizm boyınsha departament janında Turizm tarawındaǵı reformalar shtabınıń jumısı jolǵa qoyılsın.

Tómendegiler:

(a) Turizm tarawındaǵı reformalar shtabı aymaqlar, tarmaqlar hám iri turistlik obektler kesiminde turizm tarawındaǵı máselelerdi monitoring etiw hám sheshiw, jańa imkaniyatlardı anıqlaw hám de iske qosıw ilajların kórip baradı;

(b) Turizm tarawındaǵı reformalar shtabına tartılǵan (xızmet saparına jiberilgen) mámleketlik uyımlar hám shólkemler xızmetkerleriniń miynetine haqı tólew hám olardı materiallıq xoshametlew muǵdarları hám shártleri tolıq saqlanıp qaladı jáne xızmet saparı dawamında olardıń tiykarǵı jumıs ornı boyınsha byudjet shólkemleriniń bar tastıyıqlanǵan byudjet parametrleri hám byudjetten tısqarı qarjıları sheńberinde aylıq miynet haqısına 20 procent muǵdarında ústeme tólenedi.

Komitet:

(a) bir ay múddette Turizm komiteti haqqındaǵı rejeni;

(b) eki ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.

Komitet Tashkent qalası Ámir Temur prospektı 107b-jay mánzili boyınsha jaylastırılsın.

Usı qarardıń orınlanıwın nátiyjeli shólkemlestiriwge juwapker hám jeke juwapker etip Turizm komitetiniń baslıǵı belgilensin.

Usı qarardıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidenti Administraciyası Kreativ ekonomika hám turizm boyınsha departamentiniń baslıǵı G.O.Umerovaǵa júklensin.

 

Ózbekstan Respublikası Prezidenti

Sh.Mirziyoev