Ózbekstan Respublikası Prezidentiniń Pármanı

Turaq jay tarawınıń turaqlı rawajlanıwın támiyinlew, turaq jay qurılısı hám onı satıp alıwdıń teń salmaqlı sistemasın qáliplestiriw, házirgi talap hám zárúrliklerdi esapqa alǵan halda turaq jay qurılısınıń kólemin belgilew hám tarawda mámleketlik basqarıw nátiyjeliligin arttırıw, sonday-aq, turaqlı ekonomikalıq ósiw, xalıqtıń sanınıń artıp barıwı hám urbanizaciya processlerinen kelip shıǵıp, hár bir puqara ushın qolaylı jasaw sharayatların jaratıw maqsetinde qarar etemen:
I. Maqsetler.
1. Usı Pármannıń tiykarǵı maqseti etip Turaq jay tarawın turaqlı hám teń salmaqlı rawajlandırıwdı támiyinlew, 2040-jılǵa shekem hár jılı qurılıp atırǵan turaq jaylardıń sanın eki esege arttırıp, 421 mıńǵa jetkeriw, ipoteka kredit portfelin 10 eseden aslam kóbeytken halda 56,7 milliard AQSh dollarına jetkeriw belgilensin.
2. Tómendegiler turaq jay tarawın turaqlı hám teń salmaqlı rawajlandırıwdıń tiykarǵı baǵdarları etip belgilensin:
(a) iri aglomeraciyalarda turaq jay fondınıń ósiwin hám qala ortalıǵın rawajlandırıwdı támiyinlegen halda urbanizaciya processlerin qollap-quwatlaw;
(b) xalıqtıń turaq jay sharayatların jaqsılaw hám “Jańa Ózbekstan” massivlerin qurıw jumısların izbe-iz dawam ettirgen halda turaq jay fondında zamanagóy turaq jaylardıń úlesin 2040-jılǵa shekem 50 procentke jetkeriw;
(v) turaq jay bazarına bank qarjısı hám institucional investorlar qarjıların, sonıń ishinde, ipoteka kreditinen paydalanǵan halda tartıw;
(g) úlesli qurılısqa investiciya kirgizip atırǵan fizikalıq shaxslardıń huqıqların qorǵaw;
(d) turaq jay qurılısı tarawın “Turaq jaydıń birden-bir turmıs cikli” principi tiykarında kompleksli reformalaw hám onı ámelge asırıwdaǵı tosqınlıqlardı saplastırıw.
II. Baǵdarlamalıq hújjetler hám olardı ámelge asırıw mexanizmleri
3. Tómendegiler:
(a) Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarları (keyingi orınlarda – tiykarǵı baǵdarlar) 1-qosımshaǵa muwapıq;
(b) Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarları boyınsha maqsetli kórsetkishler 2-qosımshaǵa muwapıq;
(v) Ózbekstan Respublikasında 2040-jılǵa shekemgi dáwirde turaq jay hám ipoteka bazarın turaqlı rawajlandırıwdıń tiykarǵı baǵdarların ámelge asırıw boyınsha kompleksli ilajlar 3-qosımshaǵa muwapıq tastıyıqlansın.
4. Tiykarǵı baǵdarlar urbanizaciya, turaq jay hám ipoteka bazarın 2040-jılǵa shekem rawajlandırıw tarawındaǵı mámleketlik siyasattı ámelge asırıwdıń tiykarı bolıp, bul tarawda islep shıǵılatuǵın barlıq jańa normativlik-huqıqıy hújjetler oǵan muwapıq bolıwı kerek ekenligi belgilensin.
5. Qurılısı juwmaqlanbaǵan turaq jaylar hám sanaat aymaqların birinshi gezekte qurılısqa tartıwdı, sonday-aq, ekologiyalıq taza ónimler hám energiyanı únemleytuǵın texnologiyalardı paydalanǵan halda turaq jay massivleriniń injenerlik, transport hám sociallıq infrastrukturasın aldınnan qurıwdı názerde tutatuǵın kompleksli qurılıs principi tiykarında turaq jaylardıń qurılısın shólkemlestiriw tártibi engizilsin.
6. Kompleksli qurılıs principi sheńberinde tómendegiler támiyinlenetuǵını belgilensin:
(a) kompleksli qurılıs baǵdarlamaların tek ashıq hám tolıq islep shıǵılǵan rejeler tiykarında tayarlaw;
(b) kompleksli qurılıs ushın ajıratılǵan jer uchastkaların menshiklestiriw baǵdarlamalarına kirgiziw yaki basqa joybarlarǵa tartıw hám de olardıń maqsetli baǵdarın ózgertiwge jol qoymaw;
(v) kompleksli qurılıs joybarlarına kirgiziletuǵın jer uchastkaları, kóshpes múlk obektleri hám olardıń huqıq iyeleri haqqında tolıq maǵlıwmatlardı usınıw;
(g) joybarlardı ámelge asırıwda aymaqlardıń keleshektegi sociallıq mútájliklerin esapqa alatuǵın kompleksli qatnastan paydalanıw;
(d) kóshpes múlk obekti iyesiniń ol jaylasqan jer uchastkasına ijara yamasa múlk huqıqında iyelik etiw boyınsha ayrıqsha huqıqın kepillew.
III. Ámeliy hám institucionallıq ilajlar
7. Ózbekstan Respublikasında urbanizaciya, turaq jay hám ipoteka bazarın turaqlı rawajlandırıwdı támiyinlew boyınsha muwapıqlastırıwshı keńes 4-qosımshaǵa muwapıq quramda dúzilsin.
8. Tómendegiler Ózbekstan Respublikasında urbanizaciya, turaq jay hám ipoteka bazarın turaqlı rawajlandırıwdıń tiykarǵı wazıypaları etip belgilensin:
(a) xalıq ushın turaq jayǵa iye bolıw imkaniyatın arttırıw;
(b) turaq jay qurılısında renovaciya tiykarında qurılatuǵın úylerdiń úlesin basqıshpa-basqısh arttırıp barıw hám sociallıq qorǵawǵa mútáj puqaralardı turaq jay menen támiyinlew;
(v) artıqsha turaq jay qurılısı yamasa onıń jetispewshiliginiń aldın alıw.
9. Ózbekstan Respublikası Urbanizaciya hám turaq jay bazarın turaqlı rawajlandırıw milliy komiteti (keyingi orınlarda – Milliy komitet) shólkemlestirilsin.
10. Milliy komitet:
(a) urbanizaciya processleri, turaq jay qurılısı, renovaciya hám ipoteka tarawında mámleketlik siyasattı ámelge asırıw, sonday-aq, usı baǵdardaǵı baǵdarlamalardı muwapıqlastırıw hám rawajlandırıw boyınsha wákillikli mámleketlik uyım bolıp esaplanatuǵını;
(b) óz jumısın Ministrler Kabineti menen tıǵız birge islesiwde shólkemlestiredi hám ámelge asıradı. Onda Ministrler Kabineti urbanizaciya processlerin mámleket tárepinen tártipke salıw, turaq jay qurılısı, renovaciya hám ipoteka baǵdarlamaların jáne nátiyjeli mámleketlik turaq jay siyasatın ámelge asırıwda Milliy komitetke hár tárepleme járdem beretuǵını belgilensin.
11. Tómendegiler Milliy komitet jumısınıń tiykarǵı baǵdarları etip belgilensin:
(a) urbanizaciya processlerin muwapıqlastırıw hám rawajlandırıw;
(b) nátiyjeli hám turaqlı turaq jay siyasatın islep shıǵıw hám de ámelge asırıw;
(v) renovaciya baǵdarlamaların nátiyjeli ámelge asırıwdı támiyinlew;
(g) “Jańa Ózbekstan” massivlerin qurıw jumısların muwapıqlastırıw, sonıń ishinde, aymaqlardı tańlawda nızamshılıq penen belgilengen normalar hám urbanizaciya principlerine ámel etiliwin támiyinlew.
IV. Pármannıń orınlanıwın shólkemlestiriw, támiyinlew hám qadaǵalaw
12. Ekonomika hám qarjı ministrligi janındaǵı Kadastr agentligi (keyingi orınlarda – Agentlik) Milliy komitet sistemasına ótkerilsin.
13. Ádillik ministrligi Milliy komitet, Ekonomika hám qarjı ministrligi, Qurılıs hám turaq jay kommunallıq xojalıǵı ministrligi menen birgelikte:
(a) bir hápte múddette Ózbekstan Respublikası Prezidentiniń “Ózbekstan Respublikası Urbanizaciya hám turaq jay bazarın turaqlı rawajlandırıw milliy komitetiniń jumısın shólkemlestiriw ilajları haqqında”ǵı qararınıń joybarın;
(b) bir ay múddette Ózbekstan Respublikası Prezidentiniń “Ózbekstan Respublikası Urbanizaciya hám turaq jay bazarın turaqlı rawajlandırıw milliy komiteti janındaǵı Kadastr agentligi jumısın shólkemlestiriw ilajları haqqında”ǵı qararınıń joybarın;
(v) eki ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar boyınsha usınıslardı belgilengen tártipte kirgizsin.
14. Ekonomika hám qarjı ministrligi:
(a) bir ay múddette Milliy komitettiń jumısın shólkemlestiriw ushın talap etiletuǵın qarjılardı 2025-jılı ajıratsın. Onda Milliy komitetti mebel, kompyuter hám basqa da zárúr úskeneler menen támiyinlew ushın qarjı ajıratılıwın názerde tutsın;
(b) 2026-jıldan baslap hár jılı Mámleketlik byudjet parametrlerin qáliplestiriwde Milliy komitettiń jumısın qarjılandırıw ushın zárúr qarjılardı názerde tutsın.
15. Ózbekstan Respublikası Prezidentiniń 2023-jıl 25-yanvardaǵı “Respublika atqarıw hákimiyatı uyımlarınıń jumısın nátiyjeli jolǵa qoyıwǵa baylanıslı birinshi gezektegi shólkemlestiriw ilajları haqqında”ǵı PP-14-sanlı Pármanına 5-qosımshaǵa muwapıq ózgerisler kirgizilsin.
16. Usı Pármannıń nátiyjeli orınlanıwın shólkemlestiriw ushın juwapker hám jeke juwapker etip Urbanizaciya hám turaq jay bazarın turaqlı rawajlandırıw milliy komitetiniń baslıǵı belgilensin.
17. Pármannıń orınlanıwın qadaǵalaw hám orınlaw ushın juwapker shólkemlerdiń jumısın muwapıqlastırıw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası
Prezidenti Sh.Mirziyoev.