“Euronews”tiń jazıwınsha, Ózbekstanda Prezident pármanı menen úlken kólemdegi AI hám maǵlıwmat orayı joybarların tartıw ushın “tax-free” – “salıqtan jıraq” arnawlı zona shólkemlestirildi. Usı tárizde mámleket 85 million evrodan aslam sırt el investiciyasın tartıw, infrastrukturanı mámleket járdeminde qollap-quwatlaw, investorlardı arzan elektr energiyası hám qayta tikleniwshi derekler menen támiyinlewdi maqset etken.

Basılım bul joybardıń eń salmaqlı bólegi Qaraqalpaqstanda ámelge asırılıp atırǵanın atap ótip, tańlawdı strategiyalıq qarar dep bahaladı:
– Aymaqta elektr islep shıǵarıw tutınıwǵa salıstırǵanda 10-15 procent kóp, klimat salqın, jer maydanı kóp. Respublika Qazaqstan hám Transkaspiy koridorına eń jaqın region sıpatında ózine tán eksport potencialına iye. Durıs, Aral boyında kriziske baylanıslı suw resursları sheklengen. Nátiyjede, jańa oraylar kóp suw talap etpeydi. Yaǵnıy, az suw jumsaytuǵın suwıtıw texnologiyasınan paydalanadı. Qaraqalpaqstannıń ortasha 12-14°S temperaturası tábiyǵıy suwıtıw múmkinshiligin arttıradı. Nátiyjede energiya jumsalıwı keskin azayadı.
Sonday-aq, “Euronews” maqalasında bul baslama qosımsha jumıs orınların jaratıwı, aymaqqa IT qánigelerin tartıwı, regiondı jasalma intellekt hám kosmoslıq maǵlıwmatlar boyınsha jańa orayǵa aylandırıwı kútilip atırǵanına itibar qaratqan. Sanlı texnologiyalar ministrliginiń másláhátshisi Kamola Sobirovanıń pikirinshe, Qaraqalpaqstan úlken maǵlıwmat orayları ushın siyrek ushırasatuǵın energetikalıq, tábiyǵıy hám geografiyalıq abzallıqlardı ózinde jámlegen. Demek, bul region tek ǵana mámleket emes, al pútkil Oraylıq Aziya kóleminde AI xızmetleri eksportı ushın iri platformaǵa aylana aladı.
Mámleketimiz basshısınıń pármanı Ózbekstannıń 2030-jılǵa shekem tolıq AI ekosistemasın jaratıw rejesine únles. Hújjette elimizge 860 million evrodan aslam investiciya tartıw, universitetler menen birgelikte AI laboratoriyaların ashıw, keminde 100 jasalma intellekt joybarın iske qosıw hám IT xızmetleriniń eksport bahasın 4,3 milliard evroǵa jetkeriw belgilengen. Basılımnıń juwmaqlawshı sheshiminde mámleketimizdiń AI hám maǵlıwmat orayları ushın arnawlı salıqtan azat aymaq shólkemlestiriliwi tek ǵana texnologiyalıq sekiriw emes, al ekologiyalıq hám ekonomikalıq reabilitaciya strategiyasınıń da áhmiyetli basqıshı sıpatında bahalanǵan.

Musulmon Ziyo, ÓzA