Prezident Shavkat Mirziyoevqa sırtqı miynet migraciyası sistemasın jetilistiriw hám migraciya processlerin xalıqaralıq standartlar tiykarında jolǵa qoyıw máseleleri boyınsha málimleme berildi.

Keyingi jılları mámleketimizde puqaralardı sırt elge miynet etiw ushın tártipli jiberiw boyınsha ámelge asırılıp atırǵan sistemalı jumıslar sebepli miynet bazarı diversifikaciyalanbaqta, puqaralar tiykarınan joqarı miynet haqı tólenetuǵın jumıs orınlarında islew ushın sırt elge ketpekte. Nátiyjede 2016-jılǵa salıstırǵanda sırt elde jumıs islep atırǵan puqaralardıń sanı azayǵan bolsa da, olar tárepinen jiberilgen qarjı 3,8 milliard dollardan 2025-jıldıń on ayınıń juwmaǵı boyınsha 15,8 milliard dollarǵa jetti.
Prezentaciyada sırt el miynet bazarında maman qánigelerge talap úlken ekeni atap ótildi. Házirgi waqıtta 140 mıń qánigege buyırtpa bar, biraq til hám kásiplik mamanlıq boyınsha talaplarǵa juwap bere alatuǵın qánigelerdi tayarlaw baǵdarında islenetuǵın jumıslar ele kóp ekenligi kórsetip ótildi. Bunnan tısqarı, miynet migraciyası xızmetleri hár jerde jaylasqanlıǵı sebepli adamlar áweregershilikke dus kelmekte.
Usı maqsette tarawdaǵı xızmetlerdi tártipke salıw, barlıq processlerdi “bir ayna” principi tiykarında birlestiriw wazıypası qoyıldı.
Tashkent qalası Uchtepa rayonında “Sırt elge jumısqa tayarlaw orayı”, Termiz qalasında “Birden-bir migraciya xızmetleri” orayı shólkemlestiriledi. Paytaxtımızdıń Yashnabad rayonında bolsa xalıqaralıq kompaniyalar menen birgelikte nemis hám yapon tillerine oqıtıw mektepleri ashıladı.
Keyingi jılları Evropa mámleketlerine migraciya aǵımı 4 esege kóbeygenligi atap ótildi. Ol jerde islep atırǵan puqaralardıń huqıqıy qorǵalıwın kúsheytiw áhmiyetli ekenligi atap ótildi. Házirgi waqıtta bir qatar Evropa mámleketleri menen miynet migraciyası boyınsha kelisimler joq. Prezident tárepinen tiyisli húkimetleraralıq hújjetlerge qol qoyıw jumısların jedellestiriw boyınsha tapsırma berildi.
Sonday-aq, sırt mámleketlerde migraciya boyınsha attashe hám Ministrler Kabineti janındaǵı Miynet migraciyası agentliginiń wákilxanaların kóbeytiw, elimiz aymaqlarında bolsa viza oraylarınıń kóshpeli ofislerin ashıw rejelestirilgen.
Prezentaciyada migraciya xızmetlerin sanlastırıw máselesi de kórip shıǵıldı.
“Sırt elde jumıs islew” platformasında 25 túrdegi xızmet kórsetilmekte, usı jıldıń basınan berli 524 mıń puqara onlayn xızmetlerden paydalanǵan. Biraq xızmetlerdiń hámmesi de sanlastırılmaǵan.
Prezidentimiz sistemaǵa jasalma intellekt texnologiyaların engiziw arqalı xızmet kórsetiw processlerin bunnan bılay da jetilistiriw zárúrligin atap ótti. Platformada biometrikalıq identifikaciyalaw, sırt eldegi jumıs orınların real waqıt rejiminde baqlaw, puqaralarǵa aralıqtan másláhát beriwdi jolǵa qoyıw boyınsha rejeler haqqında málimleme berildi. Migraciya agentliginde puqaralarǵa kúni-túni operativ járdem beretuǵın situaciyalıq oray shólkemlestiriw usınıs etildi.
Prezentaciyada nızamsız migraciya hám konsalting xızmetlerin kórsetiwde aldawshılıq jaǵdaylarınıń kóbeyip baratırǵanı kórsetip ótildi. Usı múnásibet penen miynet migrantlarınıń huqıqıy sawatlılıǵın arttırıw maqsetinde xalıqaralıq aeroportlarda interaktiv migraciya infokiosklerin ornatıw, licenziyasız jumıs alıp barǵan konsalting shólkemleri ushın járiyma muǵdarın arttırıw usınıs etildi. Jınayat kodeksine nızamsız migraciyanı shólkemlestiriw hám járdem bergeni ushın juwapkershilik kirgiziw máselesin úyreniw tapsırıldı.
Mámleketimiz basshısı bildirilgen usınıslardı maqullap, miynet migraciyası processlerin jáne de qolaylı, qáwipsiz hám ashıq-aydın etiw boyınsha juwapkerlerge qosımsha kórsetpeler berdi.

ÓzA