Paytaxtımızdaǵı Islam civilizaciyası orayında “Oraylıq Aziya: ulıwma ruwxıy, aǵartıwshılıq miyras hám ulıwma keleshek” atamasındaǵı xalıqaralıq kongress sheńberinde Oraylıq Aziya mámleketleri hám Ázerbayjannan kelgen miymanlar ushın Oray ekspoziciyası boylap ekskursiya shólkemlestirildi.

Ózbekstandaǵı Islam civilizaciyası orayı burın tariyxımızda bolmaǵan úlken hám biybaha joybar bolıp esaplanadı. Oraydıń imaratı tariyxıy esteliklerge únles túrde qurılǵan. Gúmbez hám portallar, naǵıslardıń óz-ara úylesimligi oǵan ayrıqsha kórik hám sawlat baǵıshlaǵan.
Islam civilizaciyası orayı ilimiy-izertlew bólimleri, siyrek ushırasatuǵın qoljazbalardıń milliy reestrin júrgiziw bólimi, qoljazbalar fondı, kitapxana hám arxivler, xalıqaralıq bólim, zıyarat turizmi, derektanıw hám baspa jumısı bólimlerinen ibarat.
Sonday-aq, onıń birinshi qabatında 15 mıń kvadrat metr maydandı iyelegen kórgizbe-galereya jaylasqan. Onda hár qıylı tariyxıy dáwirlerge baylanıslı buyımlar hám artefaktlar kórsetilip, ata-babalarımızdıń dóretiwshilik potencialı zamanagóy texnologiyalar hám sanlı qurılmalar járdeminde sáwlelendiriledi.
Ekinshi qabatta bolsa 100 mıń qoljazba hám litografiya, bir millionnan aslam kitaplardı óz ishine alǵan úlken kitapxana jaylasadı. Sonday-aq, bul qabatta Islam civilizaciyası orayınıń ilimiy bólimi hám xalıqaralıq shólkemlerdiń ofisleri de jaylasqan.
Oraydıń muzey ekspoziciyası “Islamǵa shekemgi civilizaciyalar”, “Birinshi Renessans dáwiri”, “Ekinshi Renessans dáwiri”, “Ózbekstan – XX ásirde”, “Jańa Ózbekstan – Úshinshi Renessans tiykarı”, “Quranı kárim” zallarınan ibarat. Bul bólimler elimizdegi civilizaciya rawajlanıwınıń túrli dáwirlerin sáwlelendiredi.
Kongress 15-noyabrge shekem dawam etedi.

Gulnoza Boboeva, ÓzA