Qádirli doslar!

Bárinen burın, Siz, ázizlerdi – Oraylıq Aziya mámleketleri hám Ázerbayjannan kelgen belgili ilimpaz hám izertlewshiler, mádeniyat hám kórkem óner ǵayratkerlerin, xalıqaralıq shólkemlerdiń wákillerin, bay ruwxıy-aǵartıwshılıq miyrasımızdıń áhmiyetli máselelerine baǵıshlanǵan birinshi xalıqaralıq kongresstiń barlıq qatnasıwshıların shın júrekten qutlıqlawdan oǵada quwanıshlıman.
Bizge belgili, ázeliy doslıq hám tuwısqanlıq baylanısları menen baylanısqan Oraylıq Aziya mámleketleri hám Ázerbayjan xalıqların ulıwma tariyx hám mádeniyatımız, bay ruwxıy hám ilimiy miyrasımız jáne de birlestirip keledi.
Mámleketimiz aymaǵında jasap dóretiwshilik penen shuǵıllanǵan ullı oyshıllar dúnyanı bilim hám aǵartıwshılıq nurı menen jarıtıp, fundamental shıǵarmaları, belgili ilimiy oylap tabıwları arqalı dúnya rawajlanıwına múnásip úles qosqan.
Bul ánjuman jańadan qurılǵan Ózbekstandaǵı Islam civilizaciyası orayında bolıp ótip atırǵanı biykarǵa emes, álbette. Bul sawlatlı komplekste úsh mıń jıldan aslam dańqlı tariyx, sonıń ishinde, regionımız jerindegi Birinshi hám Ekinshi Renessans dáwirlerin, sonday-aq, Jańa Ózbekstannıń búgingi rawajlanıwı hám keleshegin jámlegen siyrek ushırasatuǵın intellektuallıq-mánawiy mákanda Sizler bul haqıyqattı anıq seziniwińiz múmkin.
Húrmetli kongress qatnasıwshıları!
Túrli regionlarda qarama-qarsılıq hám kelispewshilikler kúsheyip baratırǵan házirgi qıyın dáwirde tınıshlıq hám turaqlılıqtı saqlaw, hár bir jumısta ilim hám aǵartıwshılıqqa súyeniw, túrli xalıqlar arasında óz-ara awızbirshilik ortalıǵın bekkemlew, civilizaciyalararalıq qarım-qatnastı kúsheytiw bárshemizdiń eń áhmiyetli wazıypamız bolıp qalmaqta.
Ózbekstanda bul baǵdarda úlken reformalar ámelge asırılmaqta. Sońǵı jılları derlik 500 jańa ulıwma bilim beriw mektebi qurılǵanı, joqarı oqıw orınlarınıń sanı 77 den 202 ge jetkeni, Prezident mektepleri, ullı ilimpaz hám oyshıllardıń atları menen atalatuǵın dóretiwshilik mektepleri jumıs alıp barıp atırǵanın ayrıqsha atap ótiw orınlı.
Xalıqaralıq sheriklerimiz benen ruwxıy-aǵartıwshılıq miyrastı saqlaw boyınsha tájiriybe hám pikir almasıw, birgeliktegi izertlew hám joybarlardıń tiykarǵı baǵdarların anıqlap alıw bunnan keyin de turaqlı itibarımız orayında boladı.
Sizlerdiń qatnasıwıńızda Oraylıq Aziyadaǵı islam civilizaciyasınıń global aǵartıwshılıq háreketi, ilim hám mádeniyattıń rawajlanıwına qosqan úlesin tán alıw haqqında BMSh Bas Assambleyasınıń arnawlı rezolyuciyası joybarın islep shıqsaq, bul baǵdarda úlken ámeliy qádem boladı. Biz kelesi jılı BMShtıń Bas rezidenciyasında ullı babalarımızdıń bay ilimiy hám ruwxıy miyrasına baǵıshlap shólkemlestiriletuǵın prezentaciya sheńberinde usı rezolyuciyanı qabıl etiw boyınsha óz aldına ilaj ótkeriwdi rejelestirgenbiz.
Ullı tariyxqa iye Oraylıq Aziyanıń ilim hám aǵartıwshılıq orayı sıpatındaǵı ornın jáne de bekkemlew ushın birgelikte nátiyjeli jumıs alıp barıwımız zárúr hám bul maqtanıshlı jolda barlıq sharayatlardı jaratıp beriwge tayarmız.
Búgingi ánjuman keleshekte de turaqlı ótkerilip, ilimiy-mádeniy turmısımızda nátiyjeli pikirlesiw maydanına aylanatuǵınına isenemen.
Bársheńizge bekkem densawlıq, maqtanıshlı jumısıńızda jańa tabıs hám áwmetler, kongress jumısına bolsa tabıslar tileymen.

Shavkat Mirziyoev,
Ózbekstan Respublikası Prezidenti