Ózbekstan Respublikası Prezidenti Shavkat Mirziyoevtiń mirát etiwine bola Qazaqstan Respublikası Prezidenti Qasım-Jomart Toqaev 14-16-noyabr kúnleri mámleketlik sapar menen elimizde boladı.

Sapar baǵdarlamasına muwapıq, joqarı dárejedegi sóylesiwler jáne Ózbekstan hám Qazaqstan jetekshileriniń basshılıǵında Joqarı mámleketleraralıq keńestiń ekinshi májilisiniń ótkeriliwi názerde tutılǵan.
Kún tártibindegi tiykarǵı tema – sawda, sanaat kooperaciyası, transport hám logistika, energetika, awıl xojalıǵı, suw resursları, mádeniy-gumanitarlıq joybarlar sıyaqlı tiykarǵı baǵdarlarda birge islesiwdi tereńlestiriw.
Regionallıq hám globallıq siyasattıń áhmiyetli máseleleri, kóp tárepleme formatlar sheńberindegi birge islesiw boyınsha pikir alısıladı.
Xalıqaralıq sanaat kooperaciyası orayı hám bir qatar birgeliktegi joybarlardı iske qosıw, Ózbekstan – Qazaqstan strategiyalıq sheriklik hám awqamlaslıq qatnasıqların jáne de bekkemlewge qaratılǵan hújjetler toplamına qol qoyıw názerde tutılǵan.
Qazaqstan Respublikası Prezidenti Oraylıq Aziya mámleketleri basshılarınıń jetinshi Másláhát ushırasıwında da qatnasadı.

ÓzA