Ózbekstan Respublikası Prezidenti Shavkat Mirziyoev multimodal tasıwlar boyınsha xalıqaralıq forumda qatnasıw ushın elimizge kelgen Túrkiy mámleketler shólkemi Aqsaqallar keńesiniń baslıǵı Binali Yildirimdi qabılladı.

Ushırasıw aldınan joqarı mártebeli miyman mámleketimiz basshısına Túrkiya Prezidenti Rejep Tayyip Erdoǵannıń sálemin hám eń jaqsı tileklerin jetkerdi.
Keńestiń kóp tárepleme baslamalardı muwapıqlastırıw hám alǵa qoyıwdaǵı ornı hám belsene qatnasıwınıń artıp baratırǵanın esapqa alıp, shólkem sheńberindegi birge islesiwdi bunnan bılay da keńeytiw máseleleri kórip shıǵıldı.
Usı jılı Budapesht hám Gabala qalalarında ótken Túrkiy mámleketler shólkemi sammitlerinde Ózbekstan tárepinen alǵa qoyılǵan strategiyalıq usınıslardı ámelge asırıwǵa ayrıqsha itibar qaratıldı.
Prezidentimiz Aqsaqallar keńesiniń institucionallıq potencialın bekkemlew, sonday-aq, túrkiy xalıqlardıń milliy dástúrleri, ruwxıy miyrası hám mádeniy birligin saqlawǵa qaratılǵan birgeliktegi joybarlardı alǵa qoyıw boyınsha “Jol kartası”n islep shıǵıwdı usınıs etti.

ÓzA