Ózbekstan Respublikası Prezidenti Shavkat Mirziyoev 12-noyabr kúni BMShtıń Bilimlendiriw, ilim hám mádeniyat máseleleri boyınsha shólkemi (YuNESKO)niń bas direktorı lawazımına saylanǵan Holid al-Ananiydi qabılladı.

Samarqand qalasında bolıp ótken YuNESKO Bas konferenciyasınıń 43-sessiyasınıń juwmaqları hám BMShtıń bul abıraylı institutı menen birge islesiwdi bunnan bılay da rawajlandırıw perspektivaları kórip shıǵıldı.

Sóylesiw aldınan mámleketimiz basshısı Holid al-Ananiydi joqarı lawazımǵa saylanǵanı menen qutlıqlap, aldaǵı jumıslarında tabıslar tiledi.

Óz gezeginde, jańadan saylanǵan bas direktor Ózbekstan Prezidentine shólkemniń bas ilajı qollap-quwatlanǵanı hám joqarı dárejede shólkemlestirilgeni ushın ayrıqsha minnetdarshılıq bildirdi.

Ózbekstan hám YuNESKO arasında keń kólemli baǵdarlardı qamtıp alǵan sistemalı hám nátiyjeli birge islesiw jolǵa qoyılǵanı qanaatlanıwshılıq penen atap ótildi. Táreplerdiń birge islesiwdi bunnan bılay da jedellestiriw, sonıń ishinde, shólkemniń mámleketimizdegi joybarlaw jumısın keńeytiw baǵdarındaǵı umtılısı isenimli ekeni tastıyıqlandı.

YuNESKO Bas konferenciyanıń ashılıw máresiminde Ózbekstan Respublikası Prezidenti tárepinen alǵa qoyılǵan strategiyalıq baslamalardı birgelikte ámelge asırıwǵa tayar ekeni atap ótildi.

ÓzA