Prezident Shavkat Mirziyoevqa inflyaciyanı jılawlaw hám makroekonomikalıq turaqlılıqtı támiyinlew boyınsha ámelge asırılıp atırǵan jumıslar hám 2026-jılǵa mólsherlengen wazıypalar haqqında málimleme berildi.

Ishki bazardı toyındırıw hám inflyaciya faktorların jılawlaw boyınsha izbe-iz jumıslar sebepli turaqlı ekonomikalıq ósiw támiyinlenip atırǵanı, inflyaciyanı tómenletiw hám milliy valyutanı bekkemlewde unamlı nátiyjelerge erisilgeni atap ótildi.
2025-jıl 1-noyabr jaǵdayına bola, jıllıq inflyaciya dárejesi ótken jılǵı 10,2 procentten 7,8 procentke shekem tómenlegen. 2026-jılı bul kórsetkishti 7 procentke shekem túsiriw, 2027-jılı bolsa 5 procent sheńberinde uslap turıw rejelestirilmekte.
Usı maqsette ishki bazarda tovar hám xızmetler usınısın xoshametlewge ayrıqsha itibar qaratıladı. Atap aytqanda, 2026-jılı bankler agrar tarmaq, azıq-awqat sanaatı hám xızmet kórsetiw tarawlarındaǵı joybarlardı qarjılandırıwdı keńeytedi.
Májiliste tiykarǵı túrdegi azıq-awqat ónimleri bahalarınıń turaqlılıǵın támiyinlew ushın barlıq zárúr ilajlardı kóriw áhmiyetli ekenligi atap ótildi.
Joqarı ósiw pátleri hám xalıqtıń bántligin támiyinlew maqsetinde kelesi jılı kommerciyalıq bankler tárepinen ekonomikaǵa ajıratılatuǵın kreditlerdiń kólemi 450 trillion sumǵa jetkeriledi.
Mámleketimiz basshısına mikro, kishi hám orta biznesti qollap-quwatlaw boyınsha berilgen tapsırmalardıń orınlanıwı haqqında málimleme berildi. Jıl basınan berli isbilermenlik subektlerine 116 trillion sumlıq kreditler ajıratıldı, bul ótken jılǵa salıstırǵanda 1,4 esege kóp.
Máhálle kesiminde islesiw sheńberinde 89 mıń puqaranıń biznes baslamaları qollap-quwatlanıp, olarǵa 1,1 trillion sumlıq kreditler ajıratıldı. Jıldıń aqırına shekem bul kórsetkish 100 mıńǵa jetkeriledi.
2026-jılı da kámbaǵallıqtı qısqartıw, xalıqtı isbilermenlikke jedel tartıw boyınsha jumıslardı izbe-iz dawam ettiriw rejelestirilgen. Mikro, kishi hám orta biznesti kreditlew kólemin 140 trillion sumǵa jetkeriw, jáne 100 mıń puqaranıń joybarların qollap-quwatlaw mólsherlengen.
Prezidentimiz xalıq hám biznes ushın turaqlı finanslıq ortalıq jaratıw, bank sistemasına isenimdi bekkemlew hám finans bazarında salamat básekini rawajlandırıw bunnan bılay da bank-finans siyasatınıń bas wazıypası bolıwı kerek ekenligin atap ótti.
Juwapkerlerge inflyaciyanı jılawlaw, isbilermenlik baslamaların qollap-quwatlaw, mámleketimizdiń makroekonomikalıq turaqlılıǵın bekkemlew boyınsha qosımsha tapsırmalar berildi.

ÓzA