«Aymaqlıq elektr tarmaqları» AJ Qaraqalpaqstan aymaqlıq filialı tárepinen ǵalaba xabar qarallarınıń wákilleri ushın press-tur shólkemlestirilip, jurnalistler Nókis rayonındaǵı Diyqan arna mákan puqaralar jıyınındaǵı jumıslar menen tanıstırıldı.

Qánigeler tárepinen 2025-jılǵı gúzgi-qısqı máwsimge tayarlıq kóriw maqsetinde respublikamız aymaǵında jasawshı jeke xojalıq tutınıwshılardı, sociallıq hám sanaat tarmaqların úziliksiz elektr energiyası menen támiyinlew maqsetinde ámelge asırılıp atırǵan jumıslar boyınsha maǵlıwmatlar berildi,
Atap ótilgenindey, búgingi kúnde «Aymaqlıq elektr tarmaqları» AJ Qaraqalpaqstan aymaqlıq filialınıń balansında uzınlıǵı 20 479,5 kilometrlik 0,4-110 kV.lıq elektr uzatıw tarmaqları, 6793 transformatorlıq punktler bolıp, olar arqalı respublikamız aymaǵında jasawshı jeke xojalıq tutınıwshılar, sociallıq hám sanaat tarmaqları elektr energiyası menen támiyinlenbekte.
2025-jıldıń yanvar-avgust ayları daӯamında úziliksiz elektr energiyası menen támiyinlew maqsetinde, uzınlıǵı 2411,3 kilometrlik, 0,4-110 kV.lıq elektr tarmaqlarına hám 730 transformatorlıq punktlerge iri ońlaw jumısları rejelestirip, búgingi kúnde uzınlıǵı 2434,3 kilometrlik, 0,4-110 kV.lıq elektr tarmaqları, 745 transformatorlıq punktlerge iri ońlaӯ jumısları orınlandı.
2025-jıl dawamında úziliksiz elektr energiyası menen támiyinlew maqsetinde, uzınlıǵı 4528,2 kilometrlik 0,4-6-10 kV.lıq elektr tarmaqları, 1571 transformatorlıq punktlerge kishi ońlaw jumısları rejelestirip, búgingi kúnde uzınlıǵı 4541,9 kilometrlik, 0,4-110 kV.lıq elektr tarmaqları, 1587 transformatorlıq punktlerge kishi ońlaw jumısları orınlandı.
Gúzgi-qısqı máwsimge tayarlıq jumısları boyınsha avariyalıq rezerv materialları jámlendi. Sonnan 67 tarmaqlıq transformator, 67,9 tonna transformator mayı, 4,7 tonna AS markalı sım, 9,8 kilometrlik kabel, 546 temir beton baǵanaları (opor), 4050 ajıratqısh, avtomat, rubilnik, izolyator, nakonechnik, kabel muftalar hám avariyalıq awısıq bólekler (avariyalıq zapas) menen támiyinlendi. Bunnan tısqarı 39 arnawlı texnika, brigadalar ushın 48 avtotransport hám avariyalıq jaǵdaylardı tez-arada saplastırıỹ ushın 80 brigada tayar halatqa keltirildi.
– Prezidentimizdiń 2024-jıl 23-sentyabrdegi arnawlı qararı menen awır aymaqqa kirgizilgen máhállelerge qarjı ajıratılıp, sonıń esabınan 39,5 kilometrlik elektr tarmaqların rekonstrukciyalaw, modernizaciyalaw jumısları rejelestirildi, – deydi Nókis rayonı elektr tarmaqları bóliminiń baslıǵı D.Eshniyazov. – Házirgi waqıtta rejedegi jumıslar tolıq orınlandı.
– Awılımızda 800 den aslam xojalıq jasaydı. Bul jerge 1993-jılı 120 aǵash baǵana alıp kelinip, elektr tarmaqları tartılǵan edi. Sol waqıtta bul jumıslarǵa ózim de qatnastım. Ayırım jerlerde xojalıqlar tabılǵan aǵashın qadap, úylerine toq tarttı. Kóbisiniń tozıwı jetken edi. Jaqında awılımızdaǵı kóshelerge taza beton baǵanalar ornatılıp, jańa zamanagóy sibkabelli elektr tarmaqları tartıla basladı. Házir xojalıqlarımız onnan paydalanıp atır. Xojalıqlarda elektr arqalı qosılatuǵın texnikalar menen úskeneler kóbeyip, házirgi elektr energiyasına bolǵan talap artıp atırǵan bir waqıtta jańa elektr tarmaqlarınıń tartılıwı xalqımızǵa paydalı boldı. Biz xalqımızǵa usınday qolaylıqlar jaratıp atırǵanı ushın Prezidentimizden, respublikamız basshılarınan, rayon hákimliginen hám taraw basshılarınan oǵada minnetdarmız, – deydi usı MPJdaǵı «Shorkól» awılınıń turǵını Orazbay Dármaǵanbetov.
Press-tur dawamında qatnasıwshılar ámelge asırılıp atırǵan jumıslardıń barısı menen tanısıp, qızıqtırǵan sorawlarına juwap aldı.

Á.Jiyemuratov,
Qaraqalpaqstan xabar agentligi