Jıynalıstan keyingi tásirler

Kúni keshe mámleketimiz basshısı elimizdiń medicina hám farmacevtika xızmetkerleri menen ushırastı.
Medicina xızmetkerleri kúni múnásibeti menen shólkemlestirilgen ushırasıwda Prezident mámleketlik sıylıqlardı tapsırıp, tarawda keleshekte ámelge asırılıwı kerek bolǵan wazıypalardı belgilep beredi, bir kún aldın qabıl etken qararınıń mazmun-mánisin túsindiredi, dep oylaǵan edim. Basqalar da, sonıń ishinde, zaldaǵı qatnasıwshılardıń tiykarǵı bólegin quraytuǵın medicina xızmetkerleri de sonday pikirde edi, dep oylayman.
Solay boldı da. Barlıq aymaqlar menen videoselektor tárizinde ótkerilgen ushırasıw aldında Prezident mámleketlik sıylıqlardı tapsırdı. Taraw xızmetkerleriniń mashaqatlı miynetlerin atap ótti. Bunnan bılay bul sáneni “Medicina hám farmacevtika xızmetkerleri kúni” sıpatında belgilewdi usınıs etti.
Keyingi jılları medicina tarawında erisilgen dúnyalıq nátiyjeler (dúnyalıq dep aytıwǵa tiykarlar da keltirilgen, bunı hesh kim biykarlamaydı) ayırım sanlar arqalı atap ótildi. Soń mámleket basshısı erisilgen nátiyjeler tariyx bolǵanı, endi bar kemshiliklerdi saplastırıw, taraw aldına jańa shekler qoyıp háreket etiw zárúr ekenligin atap ótti.
Kewlindegi ashshı gáplerdi de aytıwǵa májbúr ekenin atap ótip, medicina mámleket hám xalıq arasında kópir bolıwı kerek, degen ideya búgin turmısta óz kórinisin tawıp atırǵanı, biraq ayırım basshılar bunı ańlamay atırǵanı, óz házliginen waz keshe almay atırǵanı haqqında ashınǵan túrde ayttı.
Prezidentimiz jámiyette muǵallim hám shıpakerdiń abırayı hám statusın arttırıwdı óz jumısınıń dáslepki waqıtlarınan-aq tiykarǵı maqset etip belgilengeni hám bul jumıstı basqıshpa-basqısh ámelge asırıp atırǵanın ayttı. Onıń ushın byudjetten de oǵada úlken qarjı ajıratılıp atırǵanı, xalıqaralıq shólkemler hám banklerdiń kreditleri qaratılıp atırǵanın atap ótti.
– On jıl aldın tarawda búgingidey imkaniyat, sharayat, texnologiya, pul joq edi, biraq aylıq miynet haqı da jıldan-jılǵa artıp barmaqta hám bul dawam etedi. Biraq buǵan juwap qanday bolmaqta? Tilekke qarsı, bul sorawǵa juwap beriwge qıynaladı, – dedi Shavkat Mirziyoev.
Prezidentimiz 26 qánigelesken oray tek ǵana paytaxtta emes, orınlarǵa shıǵıp, eń tómengi buwında islewi kerek ekenligin atap ótti. Tap usınday – olardıń filialları da óz qánigeligi boyınsha qaysı rayon, qalada xalıqtıń salamatlıq dárejesi awır bolsa, sol jerdegi poliklinikalar menen anıq baǵdarlama tiykarında islewi zárúr.
Májiliste mámleketimiz basshısı ayırım qánigelesken oraylardıń basshılarınıń jumısınan qanaatlanbay atırǵanı, olardıń óz wazıypasına hújdanlı qatnasta bolmay atırǵanın ashınarlı túrde ayttı. Ayırım basshılar ózine júdá úlken muǵdarda aylıq jazıp atırǵanın, bul arqalı olar ózlerine bolǵan isenimdi ayaq astı etip atırǵanın, xalıqtıń jek kóriwine ushırap atırǵanın atap ótti.
– Prezident, mámleket hesh nárse bilmeydi, dep oylamańlar, jip uzın taslanǵan, waqtı kelgende usılay tartıp alamız, biraq ol waqıtta kesh boladı, – dedi Prezidentimiz.
Májiliste jaqsı bir usınıs aytıldı. Prezidentimiz tájiriybeli shıpakerler, qánigeler densawlıqtı saqlaw basqarmaları hám bólimleri, medicinalıq oraylardıń basshılıǵına tayınlanıp, olar shólkemlestiriw jumıslarınan artpay atırǵanın, óziniń kásiplik mamanlıǵınan paydalana almay atırǵanın atap ótip, tiykarında basshılıq wazıypaların menedjerler atqarıwı, olar shıpakerlerdiń nátiyjeli islewi, nawqaslardıń tez sawalıp ketiwi ushın sharayat jaratıwı, medicinalıq mákemelerdiń materiallıq-texnikalıq bazasın bekkemlew ushın qayǵırıwı zárúr ekenligin ayttı. Kelesi jıldan usınday sistema jolǵa qoyılatuǵını bildirildi.
Májiliste eń kóp tilge alınǵan másele – tarawdı sanlastırıw hám sol arqalı korrupciyalıq jaǵdaylardıń aldın alıw boldı. Prezidentimiz taraw basshıların xalıqqa xızmet etiwge shaqırdı, mámlekettiń medicina tarawına itibarın adamlar óz turmısında seziwi ushın wazıypasın hújdanlı túrde orınlawı kerek ekenligin túsindirdi.
Mámleketimiz basshısı qolında maǵlıwmatlar bola tura, kóp basshılardı ayap, olarǵa islewi, xalıqqa xızmet etiwi ushın jáne imkaniyat berdi, názerimde. Bunnan kim qanday juwmaq shıǵaratuǵının waqıt kórsetedi, álbette.
Aytpaqshı, ushırasıwda ayırımlar turaqlı, esap-sanaq sózlerin ayta baslaǵanda Shavkat Mirziyoev “bul jerge sizler menen sóylesiw, mashqalalarǵa sheshim tabıw ushın kelgenmen, kóbirek usınıslar aytıń, máselelerdi ortaǵa taslań” dep ózi dógerekke múrájat etti hám qatnasıwshılar menen qızǵın pikirlesti. Ásirese, jaslardıń pikirleri, usınısların dıqqat penen tıńlap, hesh bir máseleni sheshimsiz qaldırmadı.
Ushırasıw dawamında bir nársege jáne bir mártebe isendim. Prezidentimiz jas bolsa da sadıq, Watan ushın, xalıq ushın xızmet etiwge tayar, hújdanı pák, qolı taza jaslarǵa úlken isenim bildirmekte hám bárqulla olardı qollap-quwatlawǵa tayar. Bolmasa, jıynalıstı juwmaqlap óz juwmaqların aytpaqshı bolǵanında sóz sorap qol kótergen jaslardı tıńlamaǵan, olar ortaǵa taslaǵan máselelerge sheshim tawıp bermegen bolar edi.

Ǵolib HASANOV,
ÓzA