Tailand Patshalıǵı Konstituciyalıq sudınıń Prezidenti Nakxarin Mektrairat basshılıǵındaǵı delegaciya Oliy Majlis Nızamshılıq palatasına keldi.

Nızamshılıq palatası Spikeriniń orınbasarı Rahim Hakimov penen ushırasıwda miymanlarǵa Ózbekstanda ámelge asırılıp atırǵan reformalar, Nızamshılıq palatasınıń nızam dóretiwshiligi baǵdarındaǵı jumısı haqqında tolıq maǵlıwmat berildi.
Sonday-aq, mámleketimizde sud-huqıq sistemasın reformalaw boyınsha keń kólemli reformalar ámelge asırılıp, jańa redakciyadaǵı Konstituciyada Konstituciyalıq sudtıń wákillikleri keńeytilgeni, sud hákimiyatınıń finanslıq erkinligin támiyinlewge baylanıslı ayrıqsha statya kirgizilgeni atap ótildi.
Óz gezeginde, N.Mektrairat Prezident Shavkat Mirziyoev tárepinen alıp barılıp atırǵan teń salmaqlı, ashıq hám konstruktivlik sırtqı siyasat, keń kólemli reformalar hám olardıń nátiyjelerin ayrıqsha atap ótti.
Oǵan bola, Ózbekstan keń kólemli reformalardı ámelge asırmaqta, Tashkent hám Samarqand qalaları xalıqaralıq diplomatiya oraylarına hám iri xalıqaralıq ilajlar – forumlar, sammitler hám konferenciyalar ótkeriletuǵın orınǵa aylandı. Sońǵı 40 jıl ishinde Ózbekstan Parijden tısqarıda YuNESKO Bas konferenciyasınıń 43-sessiyasına basshılıq etken birinshi mámleket bolıp, bul Shólkemge aǵza mámleketlerdiń Jańa Ózbekstanda ámelge asırılıp atırǵan tariyxıy reformalarǵa bolǵan joqarı iseniminiń ayqın kórinisi bolıp esaplanadı.
Ushırasıw dawamında Ózbekstan hám Tailand arasındaǵı qatnasıqlar, sonıń ishinde, parlamentleraralıq birge islesiwdi rawajlandırıw perspektivaları dodalandı.
Oliy Majlis Nızamshılıq palatasınıń Tailand Milliy Assambleyasınıń Wákiller palatası menen birge islesiw boyınsha parlamentleraralıq topar dúzilgeni eki mámleket arasındaǵı parlamentleraralıq baylanıslardı rawajlandırıw hám bekkemlewge xızmet etip atırǵanı atap ótildi.

Muhtarama KOMILOVA, ÓzAnıń xabarshısı