Bıyıl elimizde miynetkeshlerdiń haqıyqıy bayramı – kásiplik awqamları háreketiniń 120 jıllıǵı hám 11-noyabr – Ózbekstan kásiplik awqamları kúni joqarı quwanısh hám kóterińki ruwxta belgilenbekte. Prezidentimizdiń baslaması menen 2020-jılı qabıl etilgen nızamǵa muwapıq, 11-noyabr Kásiplik awqamları kúni dep belgilengen bolıp, derlik bes jıldan berli bul bayram elimizde keńnen belgilenbekte.

Ózbekstan kásiplik awqamları Federaciyasınıń Qaraqalpaqstan Keńesi tárepinen usı jıldıń 7-noyabr kúni Qaraqalpaq mámleketlik universitetinde Ózbekstanda kásiplik awqamları háreketiniń 120 jıllıǵı hám “11-noyabr – Ózbekstan kásiplik awqamları kúni” bayramına baǵıshlap kásiplik awqamları xızmetkerleri arasında sporttıń kishi futbol túri boyınsha “Ózbekstan kásiplik awqamıları Federaciyasınıń Qaraqalpaqstan Keńesi kubogi” sport jarısı ótkerildi.
Onda tarawlıq kásiplik awqamları baslıqları, juwaplı shólkemlestiriwshiler qatnasıp, jarıs qatnasıwshılarına áwmet tiledi.
Kún dawamında sport jarısı qızǵın ótip jeńimpazlar anıqlandı.
Ózbekstan mámleketlik mekemeleri hám jámiyetlik xızmeti tarawlıq komandası birinshi, Bilimlendiriw hám ilim xızmetkerleri tarawlıq komandası ekinshi, Isbilermenlik, biznes hám sawda xızmetkerleri tarawlıq komandası úshinshi orındı iyeledi.
Jeńimpaz komandaǵa hám nominaciyalar boyınsha jeńimpazlarǵa “Kásiplik awqamı kubogi”, diplom hám sawǵalar tapsırıldı.

Qaraqalpaqstan xabar agentligi