2025-jıl sentyabr ayında Qazaqstannan xalıqaralıq pul ótkermeleri kólemi 71,6 milliard tengege jetti. Avgust ayına salıstırǵanda operaciyalar sanı 5,1 procentke ósken bolsa, ulıwma kólem 1,6 procentke azayǵan.

Esabat ayında qazaqstanlılar eń kóp pul ótkermelerin Ózbekstanǵa jibergen – 25 mlrd teńge (barlıq xalıqaralıq operaciyalardıń 34,9 procenti).
Sonday-aq:
• Rossiyaǵa – 20,3 mlrd teńge (28,4 procent).
• Túrkiyaǵa – 11,3 mlrd teńge (15,8 procent).
• Gruziyaǵa – 4,2 mlrd teńge (5,8 procent).
Qánigelerdiń atap ótiwinshe, Ózbekstan hám Rossiyaǵa baǵdarlanǵan pul ótkermeleriniń ósiwi mámleketler arasındaǵı miynet hám shańaraqlıq baylanıslardıń jedellesiwi, sonday-aq, sırt elde waqtınsha jumıs islep atırǵan puqaralar sanınıń kóbeyiwi menen baylanıslı. Túrkiya bolsa turizm hám biznes tarawlarındaǵı birge islesiw sebepli reytingte óz poziciyaların bekkemlemekte.
Sonday-aq, Qazaqstanǵa Ózbekstannan pul jiberiwleriniń kólemi sentyabr ayında 2,6 mlrd teńgeni quraǵan.
Analizshilerdiń atap ótiwinshe, Qazaqstan, Rossiya hám Ózbekstan arasındaǵı eki tárepleme aqsha aǵısı valyuta kursınıń ózgeriwi hám migraciya aǵımlarına qaramastan turaqlı qalmaqta. Sonıń menen birge, sanlı pul ótkermeleri hám onlayn-servislerge qızıǵıwshılıq artıp barmaqta – olar tez hám qáwipsiz operaciyalardı ámelge asırıw imkaniyatın beredi.

Qaraqalpaqstan xabar agentligi