You Tube sońǵı jılları paydalanıwshı tájiriybesin jáne de interaktiv etiwge úlken itibar qaratpaqta. Endi platforma “layk” túymesin janlandırdı – ol tek ǵana videolardıń sanın kóbeytip qoymastan, videonıń mazmunına sáykes mini-animaciyalar menen juwap bermekte.

Máselen, avtomobil haqqındaǵı rolikte túyme basılǵanda dóńgelekler aylana baslaydı, futbol videosında top sekiredi, sayaxat blogında bolsa samolyot ushıp ketedi. Usı tárizde hár bir basıw paydalanıwshıǵa kishi sıylıqtay sezim payda etedi hám ápiwayı túyme ornına endi qızıqlı tájiriybe payda boladı.
Bul ózgeris bir qaraǵanda kúlkili yamasa kishi jańalanıw bolıp kórinse de, tiykarında You Tube ushın júdá puqta oylanǵan psixologiyalıq háreket. Insan miyi vizual sıylıqlarǵa kúshli juwap beredi. Hár saparı “layk” basılganda animaciya payda bolıwı – bul kishi “dofamin” degeni.
Usınday sıylıqlaw mexanizmleri mobil oyınlarda da keńnen qollanıladı. Olar paydalanıwshını ápiwayı háreketti tákirarlawǵa iytermeleydi, miy bolsa bul kishi quwanıshtı jáne seziniwdi qáleydi. You Tube bolsa endi usı psixologiyanı óz platformasına jáne de tereń sińdirmekte.
Nátiyjede, paydalanıwshı “layk” basıwǵa ádetlenedi, bul bolsa algoritmler ushın áhmiyetli maǵlıwmat, yaǵnıy platforma hár bir videoǵa auditoriya reakciyasın jáne de anıq bahalay aladı.
“Layk” – platformalar ushın eń áhmiyetli signal dereklerinen biri. Ol paydalanıwshınıń qızıǵıwshılıǵı, kontenttiń sapası hám usınıs sistemasınıń keyingi qádemleri ushın baǵdar beredi. Kóbirek “layk” arqalı video algoritm tárepinen joqarıraq bahalanadı, kóbirek usınıs etiledi, nátiyjede kóbirek kóriw hám reklama dáramatı payda boladı. Bul ózgeris tek sezim dárejesinde – paydalanıwshı óz basıwınıń “tásirin” sezedi. Bul bolsa algoritmlik strategiyada úlken parıq keltiredi: “layklar” sanı emes, al olardıń basıw jiyiligi hám paydalanıwshı is-háreketi menen baylanıslılıǵı tallanadı. Solay etip, animaciyalıq “layk” sisteması You Tube’qa jáne de anıǵıraq paydalanıwshıń portretin dúziw imkaniyatın beredi.
You Tube’tıń “layk” túymesin janlandırıw – bul dizayn yamasa bezew ózgerisi emes, al psixologiyalıq hám ekonomikalıq jaqtan tiykarlanǵan qádem. Ol paydalanıwshıǵa zawıq beredi, biraq negizinde platformanı jáne de “aqıllı” hám paydalanıwshı is-háreketlerine beyimlesiwsheń etedi.

Dildora DWSMATOVA, ÓzA