Ózbekstan Respublikası Prezidenti Shavkat Mirziyoev AQSh Prezidentiniń rásmiy rezidenciyası – Vashington qalasındaǵı Aq úyde bolıp ótken Oraylıq Aziya mámleketleri hám AQSh jetekshileriniń “S5+1” formatındaǵı sammitinde qatnastı.
Prezident Donald Tramptıń basshılıǵında ótken ilajda Qazaqstan Respublikası Prezidenti Qasım-Jomart Toqaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám Túrkmenstan Prezidenti Serdar Berdimuhamedov ta qatnastı.
Mámleketimiz basshısı AQSh jetekshisine tiykar salınǵanınan berli ótken 10 jılda regionallıq sawda, transport hám energetika baylanısların rawajlandırıwdıń nátiyjeli mexanizmine aylanǵan “S5+1” formatındaǵı sammit shólkemlestirilgeni ushın minnetdarshılıq bildirdi. Bul sammit Oraylıq Aziya hám AQSh arasındaǵı strategiyalıq sóylesiwdi rawajlandırıwda jańa basqıshtı baslap beretuǵını atap ótildi.
“S5+1” formatı sheńberindegi birge islesiwdi jáne de keńeytiw maqsetinde mámleketimiz basshısı bir qatar baslamalardı alǵa qoydı.
Bárinen burın, qatnasıwshı mámleketlerde gezekpe-gezek jaylastırılatuǵın turaqlı jumıs alıp baratuǵın Sekretariattı shólkemlestiriw usınıs etildi.
Mámleketlik uyımlar, kompaniyalar hám qarjı institutları arasında sistemalı sóylesiwdi támiyinlew maqsetinde ministrler dárejesinde Investiciyalar hám sawda boyınsha muwapıqlastırıwshı keńes dúziw áhmiyetli ekenligi atap ótildi. Sonday-aq, “Oraylıq Aziya investiciyalıq sherikligi” qorın iske qosıw áhmiyetli ekeni atap ótildi.
Ózbekstan jetekshisi Oraylıq Aziyanı Qubla Kavkaz hám Evropa menen baylanıstıratuǵın iri transport-kommunikaciya hám energetika joybarların ámelge asırıwda AQSh penen belsene islesiwge tayar ekenin bildirdi.
Áhmiyetli minerallardı izlew, qazıp alıw hám tereń qayta islew baǵdarındaǵı háreketlerdi nátiyjeli muwapıqlastırıw, sonday-aq, tayar ónimlerdi global jetkerip beriw shınjırlarına kirgiziw ushın Arnawlı komitetti dúziw usınıs etildi.
Region awıl xojalıǵın Amerika texnologiyaların engizgen halda modernizaciyalaw maqsetinde Regionallıq agrotexnologiyalıq innovaciyalar sherikligin shólkemlestiriw baslaması alǵa qoyıldı.
Gumanitarlıq baylanıslardı bekkemlew maqsetinde Ózbekstan Prezidenti AQShtıń jetekshi muzeylerinde Oraylıq Aziya mámleketleriniń mádeniy miyrasına baǵıshlanǵan birgeliktegi kórgizbelerdi shólkemlestiriw usınısı menen shıqtı.
Mámleketimiz basshısı gezektegi sammitti Samarqand qalasında ótkeriwdi usınıs etti.
Ilajda basqa da jetekshiler shıǵıp sóyledi.
Sammit juwmaǵında kóp tárepleme hújjetler qabıl etildi.
Sonıń menen Ózbekstan Respublikası Prezidenti Shavkat Mirziyoevtiń Amerika Qurama Shtatlarına ámeliy saparı juwmaqlandı.

ÓzA