Ózbekstan Respublikası Prezidenti Shavkat Mirziyoev 6-noyabr kúni Vashington qalasına ámeliy saparı sheńberinde Aq úyde Amerika Qurama Shtatları Prezidenti Donald Tramp penen ushırasıw ótkerdi.

Prezidentimiz dáslep Aq úydiń Húrmetli miymanlar kitabında pikir jazıp qaldırdı.
Soń Oval bólmede jetekshiler sóylesiw ótkerdi. Ózbekstan menen AQSh arasındaǵı strategiyalıq sheriklik qatnasıqların bunnan bılay da rawajlandırıw, siyasiy sóylesiwdi bekkemlew, sawda-ekonomikalıq, investiciyalıq hám mádeniy-gumanitarlıq birge islesiwdi keńeytiw máseleleri kórip shıǵıldı.
Usı jıldıń sentyabr ayında Nyu-York qalasında joqarı dárejede erisilgen kelisimlerdi ámelge asırıwǵa ayrıqsha itibar qaratıldı.
Globallıq hám regionallıq áhmiyetke iye aktual máseleler, sonıń ishinde, “S5+1” formatında Oraylıq Aziya hám AQSh arasındaǵı birge islesiwdi tereńlestiriw boyınsha pikir alısıldı.
Mámleketimiz basshısı Donald Tramptı ishki hám sırtqı siyasattaǵı joqarı tabısları menen qızǵın qutlıqladı. Onıń ótkir xalıqaralıq hám regionallıq kelispewshiliklerdi tınısh jol menen sheshiw baǵdarında qosıp atırǵan jeke úlesi hám háreketleri ayrıqsha atap ótildi.
Donald Tramp usı kúnlerde Ózbekstan jetekshisi AQSh húkimeti wákilleri, iri kompaniyaları hám finanslıq institutlarınıń basshıları menen nátiyjeli ushırasıw hám sóylesiwler ótkergenin qollap-quwatladı.
Jetekshiler birgeliktegi joybarlardı alǵa qoyıwdıń institucionallıq mexanizmlerin jaratıw hám jetilistiriw zárúr ekenligin atap ótti.
Ushırasıw juwmaǵında mámleketimiz basshısı AQSh jetekshisin ózi ushın qolaylı múddette Ózbekstanǵa rásmiy sapar menen keliwge mirát etti.

ÓzA