Xorezm wálayatınıń Úrgenish qalasındaǵı «Yoshlik» sport kompleksinde milliy gúres boyınsha 15 jastaǵı jas óspirimler arasında Ózbekstan kubogi jarısı bolıp ótti.

Jarısqa elimizdiń barlıq aymaqlarınan jas palwanlar qatnasıp, jeńimpazlıq ushın óz-ara bellesti.
Onda er balalar 38, 42, 46 hám 50 kg salmaq kategoriyaları boyınsha gúresken bolsa, qızlar 33, 36, 40 hám 44 kg salmaqta kubok jeńimpazların anıqladı.
Quwanıshlı tárepi sonda, bul jarısta Shımbay rayonındaǵı 17-sanlı ulıwma orta bilim beriw mektebiniń oqıwshısı Gúlziyba Baltabaeva barlıq qarsılasların jeńip shıǵıp, altın medal iyesine aylandı.
– Jarıs oǵada qızıqlı ótti, – deydi Gúlziybanıń treneri Qarshıǵa Boranbaev. – Jasırarlıǵı joq, sońǵı jılları kópshilik sport túrleri sıyaqlı, mámleketimizde gúres túri jaqsı rawajlanıp, chempion bolıw qıyın bolıp barmaqta. Biraq, soǵan qaramastan bizler shákirtlerimizdi hár tárepleme kúshli bolıwǵa tayarlap atırmız. Búgingi jarısta usınday shákirtlerimizdiń biri Gúlziyba Baltabaeva jeńimpaz boldı. Bizler bunnan oǵada quwanıshlımız. Nesip etse bul jetiskenlik penen toqtap qalmay, aldaǵı jarıslarda da jaqsı nátiyjelerdi qolǵa kirgiziw ushın ayanbastan miynet ete beremiz.

Adilbay Orazov,
Qaraqalpaqstan xabar agentligi sholıwshısı.