Dúnya ekonomikasında sanlı transformaciya hám logistika tarawına baylanıslı innovaciyalıq sheshimler barǵan sayın úlken áhmiyetke iye bolmaqta. Usı processte Ózbekstan da global birge islesiw imkaniyatların keńeytiw, jańa texnologiyalar hám bilimlerge tiykarlanǵan ekonomika qurıw jolında izbe-iz qádem taslamaqta.

Usı kúnlerde Sanlı texnologiyalar ministri Sherzod Shermatov basshılıǵındaǵı delegaciya, sonday-aq, IT Park Uzbekistan Baqlaw keńesiniń baslıǵı Farhod Ibragimov basshılıǵındaǵı wákiller ámeliy sapar menen AQShta bolıp tur.
Sapar etiw sheńberinde delegaciya “Wersirius Holding”tiń tiykarlas shólkemlestiriwshisi Danilo Toshich penen ushırasıw ótkerdi. Sóylesiw waqtında tárepler logistika autsorsingi, sanlı transformaciya hám kadrlar potencialın rawajlandırıw tarawlarında birge islesiw imkaniyatların dodaladı.
“Wersirius Holding” BPO hám logistika autsorsingi tarawındaǵı xalıqaralıq kompaniya bolıp, jıllıq aylanısı 200 million dollardı quraydı. Kompaniyada 500 den aslam xızmetker jumıs alıp baradı hám tórt mámlekette ofisine iye.
Sóylesiwde “Wersirius Holding” kompaniyasınıń xalıqaralıq tájiriybesinen paydalanǵan halda Ózbekstanda zamanagóy logistika infrastrukturasın rawajlandırıw, jas qánigeler ushın jumıs orınların jaratıw hám mámlekettiń xalıqaralıq logistika xızmetleri bazarındaǵı abırayın bekkemlew máselelerine ayrıqsha itibar qaratıldı.
Atap aytqanda, IT Park rezidentlik baǵdarlaması sheńberinde Ózbekstanda “Wersirius” operaciya orayın shólkemlestiriw imkaniyatı kórip shıǵıldı. Bul oray xalıqaralıq logistika jónelisleri ushın bek-ofis xızmetlerin, sonıń ishinde, dispetcherlik, júklerdi baqlaw, xızmetkerlerdi tańlaw, qáwipsizlik hám basqa da funkciyalardı usınıw rejelestirilmekte.
Ushırasıw dawamında kadrlar tayarlaw máselesine de ayrıqsha itibar qaratıldı. “Wersirius” Ózbekstanda logistika, dispetcherlik, rekruting hám sawda boyınsha oqıw baǵdarlamaların jolǵa qoyıwdı, jaslar ushın xalıqaralıq miynet bazarında talap joqarı bolǵan kónlikpelerdi qáliplestiriwdi rejelestirmekte.
Sonday-aq, kompaniya jumısın dáslepki 50 jumıs ornınan 200 ge shekem keńeytiw, keyin ala texnikalıq qollap-quwatlaw hám programmalıq támiynattı islep shıǵıw baǵdarların rawajlandırıwdı da názerde tutqan. Tárepler, sonday-aq, logistika hám sanlı xızmetler tarawlarında Ózbekstan, Serbiya hám AQSh birge islesiwiniń áhmiyetli ekenligin atap ótti.
Sóylesiwlerdiń juwmaǵında tárepler Ózbekstanda “Wersirius” regionallıq operaciyalıq orayın shólkemlestiriw, oqıw baǵdarlamaların islep shıǵıw hám logistika hám sanlı xızmetler baǵdarlarında bántlik imkaniyatların keńeytiw sıyaqlı tiykarǵı baǵdarlardı belgilep aldı.

Nigora Rahmonova, ÓzA