Búgingi kúnde málimleme texnologiyaları tarawında hayal-qızlardıń belsendiligin arttırıw, olardıń sanlı dúnyada potencialın joqarılatıw boyınsha sistemalı jumıslar islenbekte. Usı mánide, Mektepke shekemgi hám mektep bilimlendiriwi ministrligi hám “Digital generation Uzbekistan” MKSh menen birgelikte shólkemlestirilip atırǵan “Sanlı áwlad qızları” Respublikalıq tańlawı mámleketimizde hayal-qızlardı IT tarawına tartıw, olarǵa ilimiy hám ámeliy imkaniyatlar jaratıwda áhmiyetli joybarlardan biri sıpatında tán alınbaqta.

Joybardıń bas ideyası qızlardıń sanlı sawatlılıǵın arttırıw, olardı málimleme texnologiyaları, jasalma intellekt, jasıl ekonomika hám klimat ózgeriwi sıyaqlı zamanagóy tarawlarǵa qızıqtırıwdan ibarat.
Bul tańlaw tek ǵana dóretiwshilik qatnastı emes, al qızlardıń keleshektegi kásiplik baǵdarın belgilewde áhmiyetli basqısh wazıypasın da atqaradı. Rayon hám qala basqıshlarınan soń wálayat dárejesinde kúsh sınasatuǵın qatnasıwshılardıń ideyaları arasında innovaciyalıq sheshimler, startap ideyalar hám bilimlendiriw texnologiyalarına baylanıslı usınıslar da kóp ushırasadı.
Bizge belgili, hayal-qızlardı qollap-quwatlaw hám olarǵa jańa imkaniyatlar jaratıw tiykarǵı baǵdarlardan biri sıpatında belgilengen. Bunıń huqıqıy tiykarı sıpatında Ózbekstan Respublikası Prezidentiniń 2022-jıl 7-marttaǵı PP-87-sanlı pármanı qabıl etilgen. Bul hújjette hayal-qızlardıń belsendiligin arttırıw, zamanagóy kásiplerge baǵdarlaw hám olardıń ilimiy-izertlew potencialın kúsheytiw boyınsha anıq wazıypalar belgilep berilgen.
“Sanlı áwlad qızları” joybarı mine usı reformalardıń logikalıq dawamı sıpatında ámelge asırılıp atırǵanı dıqqatqa ılayıq. Tańlaw arqalı qızlar sanlı tarawda óz qábiletin kórsetiw, ilimiy-dóretiwshilik ideyaların turmısqa engiziw imkaniyatına iye bolmaqta.
Bıyılǵı tańlawda 92 mıńnan aslam qızlardıń qatnasıw ushın arza tapsırǵanı joybardıń jámiyettegi tásir sheńberi hám qızıǵıwshılıq dárejesin ayqın kórsetedi. 2021-jıldan berli turaqlı ótkerilip kiyatırǵan bul joybar dawamında 100 mıńnan aslam qızlar sanlı bilimlendiriw baǵdarlamalarında qatnasıp, IT tarawına dáslepki qádemlerin qoydı.
Tańlawda tek ǵana respublika kólemindegi qızlar emes, al BAÁ, Awǵanstan, Ázerbayjan, Iordaniya hám Qıtay sıyaqlı mámleketlerden kelgen qatnasıwshılar da óz joybarların usınıs etkenin atap ótiw kerek. Bul bolsa baslamanıń xalıqaralıq kólemge shıǵıwınan derek beredi.
Jeńimpaz qızlar ushın shólkemlestirilip atırǵan bilimlendiriw sayaxatları bolsa joybardıń ámeliy áhmiyetin jáne de arttıradı. Máselen, 2024-2025-jıllarda jeńimpazlar BAÁ hám AQShta bolıp, Emirates National School, Garvard, Massachussets texnologiya institutı (MTI) sıyaqlı abıraylı bilimlendiriw mákemeleriniń jumısı menen tanıstı. Bunday saparlar qatnasıwshılardı xalıqaralıq tájiriybe menen tanıstırıp, olardıń keleshektegi jumısı ushın jańa ilham deregi bolmaqta.
“Sanlı áwlad qızları” joybarı – bul tek ǵana tańlaw emes, al keleshekte mámleketimizdegi sanlı ekonomika tiykarın jarata alatuǵın jańa áwlad qızların tayarlaw baǵdarlaması bolıp esaplanadı. Ol málimleme texnologiyaları tarawında hayal-qızlardıń belsendiligin arttırıw, olarǵa ilimiy, dóretiwshilik hám kásiplik ósiw ushın keń imkaniyatlar jaratıwda áhmietli platforma bolıp xızmet etpekte.

Dildora DWSMATOVA,
Rustam Nazarmatov (súwret)
ÓzA