2026-jıl 1-yanvardan baslap Ózbekstanda shıǵındı xızmetleri ushın tólemlerdi úyme-úy júrip óndiriw ámeliyatı toqtatıladı. Fizikalıq hám yuridikalıq tárepler bul tólemlerdi tek ǵana onlayn tárizde, barlıq elektron tólem sistemaları arqalı ámelge asıradı.

Shıǵındılardı basqarıw hám cirkulyar ekonomikanı rawajlandırıw agentliginiń xabarına bola, bul ilajlar xalıqqa qolaylı tólem sistemasın jaratıw, billing esapların júrgiziwde ashıq-aydınlıqtı támiyinlew hám korrupciyalıq jaǵdaylardıń aldın alıw maqsetinde ámelge asırılmaqta. Bul haqqında Agentlik tárepinen Qaraqalpaqstan Respublikası, wálayatlar hám Tashkent qalasındaǵı barlıq sanitariyalıq tazalaw kárxanalarına tiyisli kórsetpeler berilgen.
Maǵlıwmat ushın, Ózbekstan Respublikasınıń 2025-jıl 7-marttaǵı Nızamına muwapıq, shıǵındı xızmetleri ushın qarızdarlıǵı bar bolǵan tutınıwshılarǵa qısqa xabar (SMS) arqalı xabarnama jiberiledi. Eger qarızdarlıq saplastırılmasa, elektr energiyası ushın tólemlerdi qabıl etiw waqtınsha sheklenedi.
Sonday-aq, Prezidenttiń 2024-jıl 4-yanvardaǵı hám 2025-jıl 24-marttaǵı tiyisli pármanlarına bola, shıǵındılardı alıp shıǵıw xızmeti ushın tólemlerdi qabıl etiw hám abonentler esabın júrgiziw tek ǵana “Taza mákan” billing sisteması hám elektron tólem sistemaları arqalı jolǵa qoyıladı.
Internet baylanısı támiyinlenbegen, aymaq oraylarınan uzaqta jaylasqan elatlı punktlerde jasawshılar ushın tólemler burınǵısınan burın, kommerciyalıq banklerdiń kassaları yamasa “Ózbekstan pochtası” AJ bólimleri arqalı ámelge asırıladı.
Ministrler Kabinetiniń 2025-jıl 16-oktyabrdegi qararına muwapıq, qattı turmıslıq shıǵındılardı jıynaw hám alıp shıǵıw boyınsha óndirilgen tólemler sanitariyalıq tazalaw kárxanaları, shıǵındılardı qayta júklew punktleri, shıǵındı poligonları, shıǵındılardı jaǵıw zavodları jáne ekosanaat zonalarında jumıs alıp barıwshı isbilermenlik subektlerine belgilengen tártipte bólistiriledi. Bul process arnawlı reje tiykarında ámelge asırıladı.

ÓzA