30-oktyabr kúni Samarqand qalasında YuNESKO Bas konferenciyasınıń 43-sessiyası sheńberinde Ózbekstan Respublikası Prezidenti Shavkat Mirziyoev hám Slovakiya Respublikası Prezidenti Peter Pellegrini sóylesiw ótkerdi.

Ózbekstan menen Slovakiya arasındaǵı strategiyalıq sheriklik hám kóp táreplemeli birge islesiw qatnasıqların bunnan bılay da keńeytiwdiń áhmiyetli tárepleri kórip shıǵıldı.
Barlıq dárejelerde eki tárepleme almasıwlar unamlı pát penen dawam etip atırǵanı, sonday-aq, tiykarǵı baǵdarlarda birge islesiw bekkemlenip atırǵanı qanaatlanıwshılıq penen atap ótildi.
Usı jılı siyasiy másláhátlesiwler hám Húkimetleraralıq komissiyanıń birinshi májilisi tabıslı ótkerildi. Isbilermenlik baylanısları jedellesti. Birgeliktegi kárxanalardıń sanı úsh esege kóbeydi.
Tovar almasıw hám investiciyalardıń kólemin arttırıw, sonday-aq, áhmiyetli tarmaqlarda sanaat kooperaciyası joybarların keńeytiw máseleleri dodalandı.
Ózbekstannan toqımashılıq, bılǵarı, miywe-ovoщ hám basqa da ótimli ónimler, Slovakiyadan kauchuk, avtomobiller ushın komplektlewshi bólekler, farmacevtika hám basqa da sanaat tovarların jetkerip beriwdi kóbeytiwge kelisip alındı. Usı maqsette milliy ónimler kórgizbelerin ótkeriw, sawda úylerin ashıw rejelestirilgen.
Sanlastırıwdı rawajlandırıwǵa ayrıqsha itibar qaratıldı.
Banklerdiń kiberqáwipsizlik monitoringin alıp barıw hám júk tasıwlardı baqlawdıń aldınǵı sistemaların engiziw boyınsha birgeliktegi oray shólkemlestiriw máselesin islep shıǵıw usınıs etildi.
Slovakiya biznesi menen avtomobil komplektlewshi bólekler, tayar sút ónimlerin islep shıǵarıw hám basqa da baǵdarlarda birge islesiwdi jáne de keńeytiwge tayarlıq bildirildi.
Gumanitarlıq hám bilimlendiriw almasıwların jedellestiriw perspektivaları kórip shıǵıldı. 2026-jılı Bratislava qalasında eki mámleket rektorlarınıń birinshi forumın ótkeriw, turizm kórgizbeleri hám óz-ara Turizm kúnlerin shólkemlestiriw usınıs etildi. Tártipli miynet migraciyasın jolǵa qoyıw máselesine de toqtap ótildi.
Kóp tárepleme maydanlarda óz-ara qollap-quwatlaw, sonday-aq, regionallıq hám xalıqaralıq áhmiyetke iye aktual máseleler boyınsha pikir alısıldı.

ÓzA