YuNESKO Bas konferenciyasınıń 43-sessiyasında qatnasıw ushın shólkemniń Bas direktorı Odri Azule xanım hám konferenciya qatnasıwshıları birinshi “Parij – Samarqand” charter reysi menen búgin azanda Samarqand qalasına keldi.

Samarqand xalıqaralıq aeroportında joqarı mártebeli miymandı Ózbekstan húkimeti hám Samarqand wálayatı hákimliginiń juwapkerleri kútip aldı.
2017-jıldan berli shólkemdi basqarıp kelgen Odri Azule ushın bul sessiya onıń YuNESKO Bas direktorı sıpatında qatnasqan sońǵı sessiyası boladı.
Samarqandta YuNESKOnıń jańa bas direktorı rásmiy túrde jumısqa kirisedi. Bul wazıypaǵa jaqında shólkem Atqarıw komitetiniń 222- sessiyasında ótkerilgen saylawda jeńip shıqqan egipetli 54 jasar Xolid Al-Ananiy tastıyıqlanadı.
Odri Azule xanım shólkemniń Samarqand forumı aldında “Dúnya” málimleme agentligine bergen intervyuinde “Bóliniwler qarım-qatnasqa kóleńke salıwı múmkin bolǵan dáwirde bul ánjuman keleshegimiz óz-ara baylanıslı ekenin esletip turıwı kerek.
YuNESKO Bas konferenciyasınıń xabarı anıq bolıwı shárt: ulıwma miyras hám jámáátlik bilim bul – biz tınıshlıq hám turaqlı rawajlanıwdı qurıwımız múmkin bolǵan tiykar bolıp esaplanadı. Samarqandta biz bilimlendiriw, mádeniyat hám ilim tillerinde sóylesemiz,” dep atap ótken.
YuNESKO Bas konferenciyasınıń 43-sessiyası sońǵı qırq jıl ishinde birinshi márte Parijden basqa qalada, 30-oktyabr – 13-noyabr kúnleri Samarqandta bolıp ótetuǵının eslep ótemiz.

ÓzA