Búgingi kúnde sırt elden Ózbekstanǵa kelip bilim alıp atırǵan studentlerdiń sanı jıldan-jılǵa artıp barmaqta.

Bunnan 3 jıl aldın sırt el studentleriniń sanı 3 mıń bolǵan bolsa, házirgi waqıtta 30 mıńǵa jetti. Óz gezeginde, Ózbekstannan sırt mámleketlerge barıp bilim alıp atırǵan jaslarımızdıń qatarı da barǵan sayın keńeyip atırǵanı quwanıshlı. Sonıń ishinde, 150 mıńǵa shamalas student jaslarımız sırt eldegi Top universitetlerde bilim almaqta.
Birlesken Milletler Shólkeminiń Joqarı bilimlendiriwge baylanıslı qánigeliklerdi tán alıw haqqındaǵı global konvenciyası áne usınday studentlerdiń alǵan qánigeliklerin tán alıw, olarǵa sharayat jaratıw maqsetinde islep shıǵılǵan. 2019-jıl 25-noyabrde islep shıǵılǵan bul konvenciya 2023-jılı 22 mámleket ratifikaciyalaǵannan soń kúshke kirgen. Házirgi waqıtta 38 mámleket bul hújjetti ratifikaciya etken. Endi, Ózbekstan da usı global konvenciyanı ratifikaciyalaw aldında.
Nızamshılıq palatasınıń májilisinde kórip shıǵılǵan “Joqarı bilimlendiriwge baylanıslı kvalifikaciyalardı tán alıw haqqındaǵı global konvenciyanı (Parij, 2019-jıl 25-noyabr) ratifikaciyalaw haqqında”ǵı nızam joybarı áne usı maqsetke qaratılǵan.
Atap ótilgenindey, Joqarı bilimlendiriw tarawında mamanlıqlardı tán alıw globallıq konvenciyası Birlesken Milletler Shólkeminiń joqarı bilimlendiriw boyınsha birinshi globallıq shártnaması bolıp esaplanadı. Atap aytqanda, ol dúnya boylap joqarı bilimlendiriw mákemelerine kiriw hám olar arasında mobillikti jaqsılaw maqsetinde oqıw kursları, bilimlendiriw haqqındaǵı hújjetler hám qánigeliklerdi tán alıwdıń universal principlerin belgileydi.
Usı Shártnamanıń tiykarǵı maqseti joqarı bilimlendiriwdegi qánigeliklerdi tán alıw ushın ádil, ashıq-aydın hám kemsitiwsiz global tiykardı jaratıw, regionlararalıq akademiyalıq mobillikti keńeytiw hám studentler, oqıtıwshılar hám izertlewshilerdiń qánigeliklerin tán alıw hám olardıń erkin háreketleniwine járdemlesiw, joqarı bilimlendiriwge baylanıslı hújjetlerdi tán alıwda barlıq regionlar ushın ulıwmalıq hám kelisilgen principlerdi islep shıǵıwdan ibarat.
Bul konvenciyanı ratifikaciyalaw joqarı bilimlendiriw tarawındaǵı qánigeliklerdi ádil, ashıq-aydın hám kemsitiwshiliksiz tán alıw ushın tiykar jaratadı. Qalaberdi, regionlararalıq akademiyalıq mobillik ushın imkaniyatlar ashıp, kvalifikaciyalardı tán alıw ámeliyatın jaqsılawǵa qaratılǵan universal principlerdi engizedi.
Sonıń menen birge, global konvenciya studentler ushın pútkil dúnya boylap bilimlendiriw hám ilimiy izertlewlerdi dawam ettiriw imkaniyatın jaratadı. Oǵan aǵza basqa da jetekshi mámleketler menen bilimlendiriw tarawındaǵı eki tárepleme birge islesiwdi jáne de keńeytedi, xalıqaralıq ilimiy birge islesiwdi rawajlandırıw imkaniyatın beredi.
Májiliste bul konvenciyanıń áhmiyetli ekenligi tán alınǵan halda nızam joybarı qabıl etildi hám Senatqa jiberildi.

Muhtarama Komilova, ÓzA