Ministrler Kabinetiniń “Transport quralların basqarıw sistemasın bunnan bılay da jetilistiriw ilajları haqqında”ǵı qararı qabıl etildi.

Oǵan bola, 2026-jıl 1-yanvardan baslap moped hám skuterlerdi, sonday-aq, eń joqarı konstruktivlik tezligi saatına 25 kilometrden aspaǵan mototransport quralların basqarıw ushın aydawshılıq gúwalıǵında “A1” kishi kategoriyası engiziledi.
2026-jıldan “A1” kishi kategoriyadaǵı aydawshılıq gúwalıǵın alıw ushın talabanlarǵa aydawshılardı tayarlaw májbúriy oqıw baǵdarlamasın ótpesten, tikkeley teoriyalıq hám ámeliy imtixanlardı tapsırıw huqıqı beriledi. Onda talabanlar ózleriniń ıqtıyarına bola oqıw kurslarında (onlayn yamasa oflayn túrde) oqıwı yamasa erkin tayarlanıwı múmkin boladı.
Aydawshılıq gúwalıǵın alıw ushın talabanlardan aydawshılardı tayarlaw oqıw baǵdarlaması boyınsha oqıwdı tamamlaǵanı haqqında gúwalıq talap etilmeydi.
“A”, “B”, “C”, “D” kategoriyadaǵı avtomototransport qurallarınan birin basqarıw huqıqın beriwshi milliy aydawshılıq gúwalıǵına iye bolǵan shaxslar “A1” kishi kategoriyadaǵı transport quralların tikkeley basqarıw huqıqına iye boladı.
“A1” kishi kategoriyadaǵı transport quralların basqarıw huqıqın beriwshi milliy aydawshılıq gúwalıǵın alıw ushın teoriyalıq imtixanda 20 sorawdan keminde 16 sına durıs juwap bergen aydawshılıqqa talabanlar ámeliy imtixanǵa qoyıladı (basqa kategoriyalar ushın – 18).
2026-jıl 1-fevraldan “A” hám “B” kategoriyadaǵı transport quralların basqarıw huqıqın alıw ushın talabanlar aydawshılardı tayarlaw boyınsha májbúriy oqıw baǵdarlamasınıń teoriyalıq bólimin erkin ózlestiriwi múmkin boladı.
“A” hám “B” kategoriyadaǵı transport quralları aydawshıların tayarlaw hám qayta tayarlaw oqıw toparların Mámleketlik jol háreketi qáwipsizligi xızmetinde dizimge alıw tártibi biykar etiledi.
2026-jıl 1-aprelden arnawlı avtomatlastırılǵan foto hám video jazıw sistemaları arqalı dizimge alınǵan tiyisli jol háreketi qaǵıydabuzarlıqları ushın da járiyma balları esaplanadı.
Járiyma balların transport quralınıń iyesi hám usı transport quralınan puqaralıq-huqıqıy qatnasıqlar tiykarında belgilengen tártipte (isenim xatı, qamsızlandırıw polisi, jol qaǵazı) paydalanıwshı basqa da aydawshılarǵa bólistiriw tártibi engiziledi.

ÓzA