Mámleketimiz basshısınıń “Jasalma intellekt texnologiyaların bunnan bılay da rawajlandırıwǵa baylanıslı qosımsha ilajlar haqqında”ǵı pármanı menen 2026-jıldıń aqırına shekem mámleketlik basqarıw uyımları, sociallıq taraw hám ekonomika tarmaqlarında jasalma intellekt texnologiyaların keńnen engiziw boyınsha keminde 100 joybar ámelge asırıladı.

2030-jıldıń aqırına shekem zamanagóy jasalma intellekt infrastrukturasın rawajlandırıwǵa 1 milliard AQSh dollarınan aslam muǵdarda sırt el investiciyaları tartıladı.
2026-jıldıń aqırına shekem mámlekette jumıs alıp barıp atırǵan joqarı bilimlendiriw shólkemlerinde 15 jasalma intellekt laboratoriyası iske qosıladı.
2025-jıldıń aqırına shekem jasalma intellekt baǵdarında ámelge asırılıp atırǵan joybarlar, baǵdarlamalar, startaplar hám biypul onlayn kurslar haqqındaǵı maǵlıwmatlardı sáwlelendiriwshi “ai.gov.uz” milliy portalı iske qosıladı.
2026-jıl 1-yanvardan baslap jaslardıń jasalma intellekt texnologiyalarına qızıǵıwshılıǵın jáne de arttırıw hám xoshametlew maqsetinde Ózbekstan Respublikası Prezidenti sıylıǵı ushın “Jasalma intellekt baǵdarındaǵı eń jaqsı startap” (President AI Award) tańlawı ótkeriledi.
Mámleketlik uyımlar, ustav fondında (ustav kapitalında) mámlekettiń úlesi 50 procent hám onnan artıq bolǵan xojalıq jámiyetleri jáne jergilikli atqarıwshı hákimiyat uyımlarınıń sanlı transformaciya jaǵdayın bahalawda jasalma intellekt texnologiyaların engiziw kórsetkishleri inabatqa alınadı.
Reyting nátiyjesine tiykarlanıp 2026-jıl 1-marttan baslap jılına eki márte eń jaqsı jasalma intellekt joybarların engizgen ministrlikler hám uyımlar arasında “Jasalma intellekt boyınsha eń jaqsı joybar” tańlawı ótkeriledi.

ÓzA