Xalıqtıń sociallıq qorǵawǵa mútáj bóleginiń turmıs sapasın jaqsılaw hám reabilitaciya imkaniyatların keńeytiw mámleketlik sociallıq siyasattıń tiykarǵı baǵdarlarınan biri bolıp esaplanadı. Keyingi jıllarda bul baǵdarda alıp barılıp atırǵan sistemalı reformalar nátiyjesinde sanatoriylerdiń jumısı da jańa basqıshqa kóterilmekte.

Sociallıq qorǵaw milliy agentligi sistemasındaǵı sanatoriylerde jaratılıp atırǵan sharayatlar, zamanagóy medicinalıq xızmetler, reabilitaciya baǵdarlamalarınıń keńeytiliwi hám jollama tiykarındaǵı imkaniyatlardıń kóbeytiliwi xalıqtıń keń qatlamların qamtıp alıwǵa xızmet etpekte.
2025-jıldıń yanvar-sentyabr aylarında Sociallıq qorǵaw milliy agentligi sistemasındaǵı sanatoriylerde xalıqtıń járdemge mútáj qatlamların salamatlandırıw hám reabilitaciyalaw jumısları jańa basqıshqa kóterildi. Usı dáwirde 11 sanatoriyde jámi 53,1 mıń puqaranıń salamatlıǵı tiklendi. Bul bolsa ótken jılǵı kórsetkishke salıstırǵanda 114,8 procentke kóp.
Sanatoriylerde dem alǵanlardıń 40,9 mıńı jollama tiykarında, 12,2 mıńı bolsa tólemli tiykarda salamatlandırıldı. Bul sanlar xalıqtıń, ásirese, sociallıq qorǵawǵa mútáj kategoriyalardıń sanatoriy xızmetlerine bolǵan talabınıń artıp baratırǵanın kórsetedi. Sonıń menen birge, tólemli xızmetlerdiń kóbeygeni sistemanıń finanslıq turaqlılıǵın da támiyinlemekte.
Jollama tiykarında salamatlıǵı tiklengenler arasında:
I hám II topar mayıplıǵı bolǵan shaxslar – 27,2 mıń (66,4%),
Jasqa baylanıslı pensiya alıwshılar – 11,9 mıń (29,1%),
Basqalardıń kútimine mútáj jalǵız kekseler – 1 022 (2,5%),
Basqa kategoriyalarǵa kiriwshi shaxslar – 808 (2%).
Bul quramnan kórinip turǵanınday, salamatlıqtı tiklew baǵdarlamalarınıń tiykarǵı bólegi mayıplıǵı bolǵan puqaralarǵa qaratılǵan. Sol arqalı mámleket olardıń densawlıǵın tiklew, sociallıq belsendiligin arttırıw hám turmıs sapasın jaqsılawdı maqset etken.
2025-jılı ayırım kategoriyadaǵı puqaralardı salamatlandırıw kólemi sezilerli dárejede keńeydi. Sonıń ishinde, urıs mayıplarına teńlestirilgen shaxslar sanı 2024-jıldaǵı 120 dan 316 ǵa jetip, 2,6 esege ósiw baqlandı. I hám II topar mayıplıǵı bolǵan shaxslardıń sanı bolsa 11 mıń 629 dan 27 mıń 197 ge shekem kóbeyip, 2,3 esege ósiwi atap ótildi. Bul kórsetkishler sońǵı jıllarda sociallıq qorǵaw sistemasında ámelge asırılıp atırǵan reformalardıń ámeliy nátiyjesi sıpatında bahalanbaqta.
Sociallıq qorǵaw milliy agentligi tárepinen sanatoriy tarmaǵın modernizaciyalaw, xızmetlerdiń sapasın arttırıw hám jollamalardı bólistiriwdi elektron túrge ótkeriw ilajları salamatlandırıw procesin nátiyjeli shólkemlestiriw imkaniyatın bermekte. Nátiyjede járdemge mútáj kategoriyalarǵa tiyisli puqaralardıń sanatoriylerge tartılıwı artıp, olardıń densawlıǵın tiklew, ruwxıy hám fizikalıq jaǵdayın jaqsılaw boyınsha kompleksli qatnas jolǵa qoyıldı.
2025-jıldıń yanvarınan sentyabrge shekemgi dáwir sonı kórsetpekte, Sociallıq qorǵaw milliy agentliginiń sanatoriy sisteması xalıqtıń sociallıq qorǵawǵa mútáj qatlamların salamatlandırıwda áhmiyetli orın iyelemekte. Salamatlıqtı tiklew kólemi jıl sayın keńeyip, sociallıq ádillik principlerine tiykarlanǵan mámleketlik siyasattıń ámeliy kórinisine aylanbaqta.
Keleshekte sanatoriy infrastrukturasın modernizaciyalaw, medicinalıq-reabilitaciyalıq xızmetlerdiń sapasın arttırıw hám sanlı basqarıw sistemaların keńnen engiziw arqalı bul baǵdar jáne de rawajlandırılıwı kútilmekte.

Dildora DWSMATOVA,
ÓzA