Parlamentleraralıq awqam 151-Assambleyasınıń “Krizis sharayatında adamgershilik normalarına ámel etiw hám adamgershilik háreketlerin qollap-quwatlaw” temasındaǵı jalpı májilisinde Oliy Majlis Senatınıń Baslıǵı Tanzila Norboeva basshılıǵındaǵı Ózbekstan parlament delegaciyası qatnastı.

Senat Baslıǵı óziniń shıǵıp sóylegen sózinde dúnyada bolıp atırǵan hár qıylı kelispewshilikler, krizisler hám gumanitar qáwip-qáterler millionlaǵan insanlardıń ómirine ayrıqsha unamsız tásir kórsetip atırǵanın atap ótti. Bunday sharayatta parlamentler insanıylıq principlerin alǵa qoyıw hám insan ómirin saqlawda sheshiwshi rol atqarıwı zárúr ekenligi ayrıqsha atap ótildi.
Assambleyada Ózbekstannıń gumanitarlıq tarawdaǵı baslamaları alǵa qoyıldı. Atap ótilgenindey, házirgi kúnde dúnya boylap 120 dan aslam qurallı soqlıǵısıwlar nátiyjesinde 310 millionǵa shamalas insanlar járdemge mútáj bolıp, bul insanıylıq normalarına ámel etiw máselesin jáne de áhmiyetli etpekte.
Ózbekstan xalıqaralıq gumanitarlıq háreketlerde belsene qatnasıp, tınısh emes regionlardaǵı mútáj xalıqqa turaq jay, medicinalıq xızmet hám sociallıq járdem kórsetiw arqalı ámeliy járdem bermekte. Bul háreketler mámleketimizdiń insanıylıq hám xalıqaralıq awızbirshilik principlerine sadıqlıǵın ayqın kórsetpekte.
Májilis sheńberinde parlamentler arasında nızamshılıq hám sanlı birge islesiwdi tereńlestiriw, gumanitarlıq resurslardı nátiyjeli hám mánzilli baǵdarlaw, global baslamalarǵa finanslıq qatnasıwdı keńeytiw, sonday-aq, gumanitar tarawda joqarı maman kadrlar tayarlawǵa baylanıslı anıq usınıslar da alǵa qoyıldı.
Atap ótilgenindey, insanıylıq – tınıshlıqtıń huqıqıy kepili, turaqlı rawajlanıwdıń ruwxıy tiykarı bolıp esaplanadı. Sol sebepli, bul processte parlamentlerdiń roli barǵan sayın artıp barmaqta.

Qaraqalpaqstan xabar agentligi