Prezident Shavkat Mirziyoev 20-oktyabr kúni Islam civilizaciyası orayına barıp, bul jerdegi ekspoziciyalar arqalı xalqımızdıń bay tariyxıy hám ruwxıy miyrasın keńnen kórsetiwge qaratılǵan jumıslar menen tanıstı.

Bul úlken hám siyrek ushırasatuǵın joybar mámleketimiz basshısınıń 2017-jıl 23-iyundegi qararına tiykarlanıp baslanǵan. Kóp ótpey, 2018-jılǵı Ramazan hayıtı kúni onıń tırnaq tası qalanǵan edi. Ótken dáwirde bul jerde úlken kólemdegi qurılıs hám abadanlastırıw jumısları ámelge asırıldı.
Oray áyyemgi arxitekturalıq dástúrlerimiz hám milliy naǵıslarımızdıń úylesliginde qurıldı. Imarattıń tórt tárepinde biyikligi 34 metrli portallar ortada bolsa 65 metrli milliy usıldaǵı gúmbez boy tiklegen.
Imarattıń oraylıq bóliminde Quranı kárim zalı jaylasqan. Bul jerde musılman dúnyasınıń biybaha ruwxıy dúrdanaları esaplanǵan áyyemgi Usmon Musxafi kórsetiledi. Sonday-aq, samaniyler, qaraxaniyler, xorezmshahlar, temuriyler hám basqa da dinastiyalar dáwirine tiyisli muqaddes kitap nusqaları, olardıń eski ózbek tilindegi awdarmaları, sonıń menen birge, dúnyadaǵı eń siyrek ushırasatuǵın qoljazba Quranlardan da úlgiler orın aladı.
Bunnan tısqarı, mámleketimiz basshısınıń baslaması menen sırt ellerde saqlanıp atırǵan tariyxımız hám ullı oyshıllarımızdıń miyrasına baylanıslı bahalı derekler hám zatlar Watanımızǵa qaytarıldı.
Oray quramında 460 orınlıq konferenciyalar zalı da qurıp pitkerilgen bolıp, xalıqaralıq kólemdegi ushırasıw hám ilimiy ánjumanlardı ótkeriw ushın barlıq zamanagóy sharayatlar jaratılǵan.
Komplekste “Islamǵa shekemgi civilizaciyalar,” “Birinshi Renessans,” “Ekinshi Renessans,” “Ózbekstan XX ásirde” hám “Jańa Ózbekstan – jańa Renessans” bólimleri shólkemlestirilgen. Bul jerde ullı oyshıllarımızdıń jumısı haqqındaǵı maǵlıwmatlar, atap aytqanda, Imam Buxariy, Imam Termiziy, Abu Mansur Moturidiy, Bahauddin Naqshband hám basqa da ulamalardıń miyrası da keńnen sáwlelendirilgen.
Sonday-aq, tariyxımızda ilim-aǵartıwshılıq hám ruwxıylıq qáwenderi bolǵan Biybixanım, Nadirabegim, Uvaysiy, Anbar atın sıyaqlı ullı insanlardıń jumısı da ayrıqsha ekspoziciya sıpatında kórsetilgen.
Mámleketimiz basshısı bárqulla oraydıń ilimiy-aǵartıwshılıq baǵdarın nátiyjeli shólkemlestiriw, onıń mazmun-mánisin bayıtıp barıw zárúrligin ayrıqsha atap ótedi. Bul baǵdarda Ózbekstan xalıqaralıq islamtanıw akademiyası, Imam Buxariy, Imam Termiziy hám Imam Moturidiy atındaǵı ilimiy oraylar menen birge islesiwdi kúsheytiw boyınsha alıp barılıp atırǵan jumıslar haqqında málimleme berildi.
Sapar etiw waqtında Prezidentimiz zallarda ámelge asırılıp atırǵan pardozlaw hám úskenelew jumısların kózden ótkerdi, bólimler hám kórgizbelerdiń mazmun-mánisi, qollanılıp atırǵan interaktiv texnologiyalar menen jaqınnan tanıstı.
Mámleketimiz basshısı eksponatlardı jergilikli hám sırt elli miymanlarǵa hár tárepleme qızıqlı jáne túsinikli etip usınıw áhmiyetli ekenligin atap ótti. Usı maqsette orayda jumıs alıp baratuǵın qánige hám gidlerdiń sanın kóbeytiw, olardı arnawlı baǵdarlamalar tiykarında tayarlaw zárúr ekenligine itibar qaratıldı.
Oraydıń jumısın mazmun jaǵınan jáne de bayıtıw, ekspoziciyalar arqalı xalqımızdıń ruwxıy hám ilimiy miyrasın tolıq kórsetiw boyınsha bir qatar usınıslar berildi.

ÓzA