Ózbekstan hám Túrkiya sport tarawındaǵı birge islesiwdi jańa basqıshqa kótermekte.

Ózbekstan mámleketlik dene tárbiya hám sport universitetine Túrkiya Birge islesiw hám muwapıqlastırıw agentliginiń (TİKA) Ózbekstandaǵı wákilxanasınıń basshısı Esin Asar Ergin xanım basshılıǵındaǵı delegaciya rásmiy sapar menen keldi.
Usı sapar sheńberinde TİKA wákilleri universitet basshıları menen ushırasıp, eki tárepleme birge islesiwdiń perspektivalı baǵdarları boyınsha sóylesiwler alıp bardı. Ushırasıw waqtında tárepler óz-ara paydalı joybarlardı islep shıǵıw, olardı ámeliyatqa engiziw hám bar imkaniyatlardan nátiyjeli paydalanıw máselelerin dodaladı.
Sóylesiwler dawamında birinshi gezekte, sport baǵdarında joqarı mamanlıqtaǵı kadrlardı tayarlaw, oqıtıwshılardıń mamanlıǵın arttırıw hám akademiyalıq almasıw baǵdarlamaların jolǵa qoyıw máseleleri dodalandı. Sonday-aq, sport ilimleri, sport medicinası hám fizikalıq jumıs tarawlarında qospa ilimiy izertlewler alıp barıw, seminar hám konferenciyalar shólkemlestiriw boyınsha kelisimge erisildi.
Sapar sheńberinde ayrıqsha itibar qaratılǵan máselelerden biri – universitet janında zamanagóy sport laboratoriyasın shólkemlestiriw boyınsha birgeliktegi joybar boldı. TİKA bul baslamanı qollap-quwatlawǵa tayar ekenin bildirdi hám laboratoriyanı texnikalıq jaqtan úskenelew, úskeneler menen támiyinlew hám xalıqaralıq standartlarǵa sáykes túrde shólkemlestiriw boyınsha óz járdemin usındı.
Sonday-aq, universitettiń materiallıq-texnikalıq bazasın jáne de rawajlandırıw, trening orayların modernizaciyalaw, mádeniy baylanıslardı keńeytiw maqsetinde ózbek-túrk sport festivalları, jaslar forumları hám basqa da xalıqaralıq ilajlardı ótkeriw baslamaları dodalandı.
Tárepler, sportta inklyuzivlikti támiyinlew, mayıplar sportın rawajlandırıw, sanlı texnologiyalardı sportqa engiziw, onlayn platformalar jaratıw hám innovaciyalıq qatnaslardı ámeliyatqa engiziw baǵdarlarında da tıǵız birge islesiwge kelisip aldı.
Sapar etiw juwmaǵında tárepler arasındaǵı baylanıslardı ámeliy basqıshqa alıp shıǵıw, birge islesiwdiń huqıqıy tiykarların bekkemlew hám turaqlı sóylesiwdi dawam ettiriwge kelisip alındı. Bul sapar etiw eki mámleket arasındaǵı doslıq hám strategiyalıq qatnasıqlardı bekkemlewde úlken áhmiyetke iye.

Nigora Rahmonova, ÓzA