Nókiste jergilikli restoran hám kafe basshıları, turistlik agentlikleriniń wákilleri qatnasıwında “QR Gastronomic Quality: Qaraqalpaqstannıń tartımlılıǵın arttırıw ushın turizm xızmetleriniń gastronomiyalıq sapasın bahalaw hám jaqsılaw” joybarın ámelge asırıw boyınsha májilis bolıp ótti.

Joybar Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondi grantı tiykarında ámelge asırılıp atırǵan bolıp, Qaraqalpaqstan Respublikasında turizmdi jáne de rawajlandırıwǵa qaratılǵan.
– Bul joybar turizm baǵdarında xızmetler sapasın bahalaw hám monitoring etiwdiń sanlı hám dástúriy mexanizmlerin islep shıǵıw hám engiziw, turizm bazarı katnasıwshıları arasında básekini kúsheytiw, aymaqtı tartımlı turistlik jerge aylandırıw arqalı jańa jumıs orınların jaratıwdı názerde tutadı, – deydi «DMO Karakalpakstan» jámiyetlik birlespesi baslıǵı M.Qosnazarov. – Búgingi ilajda joybardı ámelge asırıwdıń áhmiyetli máseleleri dodalanıp, turistlik xızmet sapasın arttırıw boyınsha pikir alısıldı.
Qaraqalpaqstanda turizm xızmetleriniń sapasın baxalaw hám monitoring etiwdiń birden-bir sistemasın jaratıw, servis sapasın hám qarıydarlardıń qanaatlanıwın arttırıw maqsetinde turistlerdin pikir-usınısların tikkeley alıw ushın mobil qosımsha hám onlayn platforma islep shıǵıw, turizm obektlerinde QR-kodlar járdeminde xızmetler sapasın operativ bahalawdı jolǵa qoyıw, xızmet kórsetiw dárejesin arttırıw hám tarawdıń eń jaqsı katnasıwshıların xoshametlewge qaratılǵan “QR Gastronomic Quality” tańlawın shólkemlestiriw, xalıqaralıq qánigelerdi tartqan halda turizm subektleri ushın kompleksli trening hám stajirovkalar ótkeriw sıyaqlı máseleler qarap shıǵıldı.
Májilis juwmaqları boyınsha qatnasıwshılar menen birgelikte Qaraqalpaqstannıń gastronomiyalıq potencialın úyreniw hám kúsheytiw boyınsha aldaǵı wazıypalar belgilep alındı.

Qaraqalpaqstan xabar agentligi.