Samarqand qalasında ǴMDAǵa aǵza mámleketler qáwipsizlik uyımları hám razvedka xızmetleri basshılarınıń 21-májilisi bolıp ótti.

Mámleketimizde birinshi márte ótkerilgen májiliste Ázerbayjan, Armeniya, Belarus, Qazaqstan, Qırǵızstan, Rossiya, Tájikstan, Túrkmenstan hám Ózbekstannıń qáwipsizlik uyımları hám razvedka xızmetleriniń basshıları qatnastı.
Májilis aldında Ózbekstan Respublikası Prezidenti Shavkat Mirziyoevtiń ilaj qatnasıwshılarına múrájatın Prezident janındaǵı Qáwipsizlik keńesiniń xatkeri Viktor Mahmudov oqıp esittirdi.
Mámleketimiz basshısı óziniń múrájatında dástúriy qáwip-qáterler kúsheyip, jańa qáwip-qáterler payda bolıp atırǵanı sebepli dúnyadaǵı jaǵday qıyın geosiyasiy sharayatta rawajlanıp atırǵanı, bul bolsa, óz gezeginde, Doslıq Awqamı mámleketleriniń máplerine tikkeley tásir etip atırǵanın atap ótken.
Atap ótilgenindey, keń kólemli urısqa aylanıp ketiwi múmkin bolǵan qurallı kelispewshiliklerdiń barǵan sayın keskinlesip atırǵanı da qáweter oyatpaqta. Sol sebepli, tariyxıy tájiriybe hám xalıqaralıq huqıqtıń ulıwma tán alınǵan normaları tiykarında turaqsızlıq oshaqların múmkin bolǵanınsha tezirek saplastırıw boyınsha ádil hám turaqlı qatnaslardı islep shıǵıw áhmiyetli ekenligi kórsetip ótildi.
Ózbekstan regionda turaqlılıq hám qáwipsizlikti támiyinlew, Doslıq Awqamı mámleketleriniń jedel rawajlanıwı jolında xalıqaralıq kún tártibindegi mashqalalı máselelerdi siyasiy-diplomatiyalıq jol menen sheshiw tárepdarı ekenligine ayrıqsha itibar qaratıldı.
Ózbekstan Prezidentiniń múrájatında mámleketlerimizdiń suvereniteti, aymaqlıq pútinligi hám konstituciyalıq tiykarlarına qáwip tuwdırıwı múmkin bolǵan qáwip-qáterlerge qarsı gúresiwde birgeliktegi háreketlerdi nátiyjeli muwapıqlastırıw ǴMDA mámleketleri qáwipsizlik hám razvedka xızmetleri uyımlarınıń tiykarǵı wazıypasına aylanıwı kerek ekenligi ayrıqsha atap ótilgen.
Ózbekstan Respublikası Mámleketlik qáwipsizlik xızmetiniń baslıǵı, general-polkovnik B.Qurbonov basshılıq etken májiliste qatnasıwshılar zamanagóy qáwip-qáterler boyınsha pikir alısıp, ǴMDA mámleketleri razvedka xızmetleri arasındaǵı birge islesiwdi bekkemlew boyınsha gezektegi wazıypalardı dodaladı.
Ushırasıw juwmaǵında delegaciyalardıń basshıları regionallıq qáwipsizlikti támiyinlew boyınsha birge islesiwdiń anıq wazıypaların hám tiykarǵı baǵdarların belgilep aldı.
Rossiya Federaciyası sırtqı razvedka xızmetiniń basshısı Sergey Narishkin májilis juwmaqları haqqında óz pikirlerin bildirip, ǴMDAǵa aǵza mámleketler qáwipsizlik uyımları hám razvedka xızmetleri basshılarınıń Samarqandtaǵı ushırasıwı nátiyjeli bolǵanın atap ótti.
– ǴMDAdaǵı hár bir mámlekettiń qáwipsizlik xızmetleri búgingi qıyın sharayatta óz elinde qáwipsizlik hám turaqlılıqtı támiyinlew baǵdarında tájiriybege iye, – dedi S.Narishkin. – Sonıń menen birge, Doslıq Awqamı regionında hár qıylı qáwip-qáterlerge qarsı gúresiw baǵdarında birgelikte háreket etiwimiz, birge islesiwdi bunnan bılay da kúsheytiw zárúrligin dáwirdiń ózi talap etpekte. Usı jaǵınan 21-májiliste usı hám basqa da baǵdarlarda maǵlıwmat almasıw, birgeliktegi háreketlerimizdi muwapıqlastırıw boyınsha pikirlesip aldıq.

Ǵolib Hasanov,
Alisher Isroilov (súwret),
ÓzAnıń xabarshıları