“Balalar miyneti hám májbúriy miynetti tolıq saplastırıw uzaq jıllar biz ushın eń awır másele bolıp kelgen edi. Tek ǵana kúshli erk-ıqrar, qatań poziciyamız arqalı biz bul qıyın mashqalanı unamlı sheshtik.” – dedi Prezident.

Ózbekstannıń balalar miyneti hám májbúriy miynetti saplastırıw boyınsha aldıńǵı tájiriybesi Xalıqaralıq miynet shólkemi tárepinen úlgi sıpatında basqa mámleketlerge usınıs etilgeni de sonnan derek beredi.
Ózbek paxtası dúnyadaǵı kóplegen abıraylı brend kompaniyalardıń “qara dizimi”nen shıǵarıldı. “Cotton campaign” shólkemi Ózbekstanǵa qoyılǵan qadaǵan etiwdi pútkilley biykarladı.
Ózbekstan sanawlı mámleketler qatarında Birlesken Milletler Shólkeminiń “Ádil ótiw processleri ushın jumıs orınların jaratıw hám sociallıq qorǵaw boyınsha globallıq akselerator” baslamasında qatnaspaqta, Xalıqaralıq miynet shólkeminiń “Sociallıq ádillik boyınsha globallıq koaliciya”da qatnaspaqta, mámleketimiz ótken jılı usı shólkemniń Hákimshilik Keńesiniń aǵzalıǵına saylandı.
“Hesh gúmansız, biz erisip atırǵan nátiyjelerde 8 millionǵa shamalas aǵzaǵa iye, eń xalıqshıl hám úlken mámleketlik emes shólkem bolǵan kásiplik awqamlarınıń múnásip úlesi bar.
Biz Ózbekstanda kásiplik awqamlarınıń erkin jumıs alıp barıwı ushın barlıq sharayatlardı jaratıp berdik hám mine usı principlerge hámiyshe sadıqpız. Bunnan bılay da kásiplik awqamlarına birlesiw huqıqın támiyinlew, olardıń jumısına aralaspaw boyınsha siyasattı qatań dawam ettiremiz.” – dedi Prezident.

ÓzA