Prezident Shavkat Mirziyoev kásiplik awqamları wákilleri menen ushırasıw ótkermekte.

Hár bir insannıń huqıq hám erkinligin támiyinlew, miynetin qorǵaw, kepillengen sociallıq qorǵawdan paydalanıwı ushın bekkem nızamlı tiykarlar jaratıldı.
Ásirese, jańalanǵan Konstituciya, jańa redakciyadaǵı Miynet kodeksi, “Xalıqtıń bántligi haqqında”ǵı, “Kásiplik awqamları haqqında”ǵı nızamlardıń qabıl etilgeni bul baǵdardaǵı áhmiyetli qádemler boldı.
Parlament janındaǵı Jámiyetlik ekspert keńesleriniń quramına kásiplik awqamlarınıń wákilleri de kirgizildi. Bul bolsa nızamlardı qabıl etiwde xızmetkerlerdiń mápi jáne de isenimli qorǵalıwına xızmet etpekte.
Jańa Ózbekstanda erkin hám kúshli puqaralıq jámiyetin qáliplestiriw de jetekshi baǵdar bolıp qalmaqta. Sociallıq institutlardı qollap-quwatlaw kólemi 2017-jılǵa salıstırǵanda 100 esege artıp, usı jılı 1 trillion 200 milliard sumǵa jetti.
Búgingi kúnde, puqaralıq jámiyeti institutlarınıń jumısına aralasqanı, jámiyetlik qadaǵalaw nátiyjelerin kórip shıqpaǵanı ushın juwapkershilik belgilendi.
Ózbekstan – Xalıqaralıq miynet shólkeminiń standartların qabıl etip atırǵan eń belsendi mámleketler qatarınan orın alıp atırǵanı dúnya jámiyetshiligi tárepinen de tán alınıp atırǵanın atap ótiw kerek. Segiz jıl aldın bul shólkemniń Ózbekstan tárepinen ratifikaciyalanǵan hújjetleriniń sanı 12 bolǵan bolsa, házirgi kúnde 25 ke jetti.

ÓzA