Energetika tarawında xalıqaralıq birge islesiwdi tereńlestiriw hám zamanagóy basqarıw tájiriybesin engiziw maqsetinde “Ózbekneftgaz” akcionerlik jámiyeti AQShtıń abıraylı “McKinsey & Company” xalıqaralıq konsalting kompaniyası delegaciyası menen ushırasıw ótkerdi.

Sóylesiw dawamında energetika sistemasın modernizaciyalaw, innovaciyalıq sheshimlerdi engiziw hám tarawdıń turaqlı rawajlanıwın támiyinlew máseleleri dodalandı.
Sóylesiw waqtında jáhán hám regionallıq energetika bazarlarındaǵı zamanagóy tendenciyalar, olardıń Ózbekstan ekonomikasına tásiri, sonday-aq, rawajlanıwdıń tiykarǵı baǵdarları hár tárepleme tallandı.
Sonıń menen birge, energiya sistemalarınıń nátiyjeliligin hám turaqlılıǵın arttırıw, tómen uglerodlı ekonomikaǵa ótiw procesinde innovaciyalıq texnologiyalar jáne zamanagóy basqarıw usılların qollanıwdıń áhmiyetli ekenligi atap ótildi.
Tárepler “McKinsey & Company” xalıqaralıq ekspertleri menen birge islesiwdiń korporativlik basqarıw sistemasın jetilistiriw, institucionallıq turaqlılıqtı bekkemlew hám “Ózbekneftgaz” AJnıń strategiyalıq potencialın arttırıwǵa xızmet etetuǵının atap ótti.
Jámiyettiń málimleme xızmetine bola, “McKinsey & Company” – dúnyadaǵı jetekshi konsalting korporaciyalarınan biri bolıp, húkimetler hám iri korporaciyalarǵa basqarıw boyınsha strategiyalıq másláhátler beredi. 66 mámlekette 150 den aslam ofislerge iye bolǵan bul kompaniya Oraylıq Aziya regionında sońǵı 20 jıl dawamında neft-gaz hám taw-kán tarawlarında iri joybarlardı ámelge asırıp kelmekte.
Ushırasıw juwmaǵında tárepler óz-ara birge islesiwdi bekkemlewge kelisip aldı.

N.Ziyodullaeva,
ÓzA