Ádil sudlaw akademiyasında “Xalıqaralıq salıstırıwda turaq jay huqıqı hám hákimshilik tártip-qaǵıydalar” atamasında gibrid tárizde ámeliy seminar bolıp ótti.

Sudyalar joqarı keńesi hám Germaniya xalıqaralıq-huqıqıy birge islesiw qorı menen birgelikte shólkemlestirilgen ilajda eki mámleket sud sistemasınıń wákilleri, ekspertler sonday-aq, Ádil sudlaw akademiyasınıń professor-oqıtıwshıları hám tıńlawshıları qatnastı.
Bizge belgili, Ózbekstan Prezidentiniń “Ádil sudlaw tarawında joqarı mamanlıqtaǵı kadrlar tayarlaw sistemasın túp-tiykarınan jetilistiriw ilajları haqqında”ǵı pármanında sud sisteması ushın joqarı mamanlıqtaǵı yurist kadrlar tayarlaw sistemasın xalıqaralıq standartlar tiykarında bunnan bılay da jetilistiriw tiykarǵı wazıypa etip belgilengen.
Pármannıń orınlanıwı sheńberinde bolıp ótken seminarda puqaralardıń turaq jayǵa bolǵan huqıqları menen minnetlemeleri, olardıń huqıqıy tiykarları, mámleketlik uyımlar menen qatnasıqlar, bul baǵdarda qabıl etilgen normativlik-huqıqıy hújjetlerdiń mazmun-mánisi hám júzege kelgen kelispewshiliklerdi sheshiw tártipleri haqqında hár eki mámlekettiń tájiriybesi haqqında sóz boldı.
Sırt el tájiriybesin úyreniw, aldınǵı ámeliyatlar menen tanısıw hám olardı milliy sud ámeliyatına engiziwde bunday ilajlardıń áhmiyeti úlken.
Bunday ilajlar akademiya tıńlawshıları ushın xalıqaralıq tájiriybeler menen jaqınnan tanısıw imkaniyatın beriwden tısqarı Ózbekstan sud sistemasında ashıq-aydınlıq hám ádillik principleriniń nátiyjeliligin arttırıwǵa da xızmet etedi.
Sanap ótilgen faktorlar, ásirese, aldınǵı tájiriybeler almasıw professional sudyalar korpusın qáliplestiriwdiń jáne de nátiyjeli mexanizmlerin islep shıǵıw hám tiykarǵı wazıypalardı belgilewde ayrıqsha áhmiyetke iye.
Seminar juwmaǵında birge islesiw perspektivaları hám birgeliktegi joybarlardı ámelge asırıw imkaniyatları da dodalandı.

N.Abduraimova, ÓzA