Oraylıq áskeriy okrug “Kattaqorǵan” poligonında Ózbekstan, Qazaqstan, Tájikstan, Qırǵız Respublikası hám Ázerbayjan qorǵanıw ministrlikleriniń bólimleri qatnasıwında iri áskeriy oqıw shınıǵıwına start berildi.

Ózbekstan Respublikası Qorǵanıw ministrliginiń áskeriy birge islesiw sheńberindegi eń úlken oqıwlarınan biri – “Birlik – 2025” Regionallıq birgeliktegi oqıwınıń saltanatlı ashılıw máresimi bolıp ótti.
Ózbekstan keyingi jılları xalıqaralıq áskeriy birge islesiw baǵdarında úlken jetiskenliklerge erisip, kóplegen mámleketler menen áskeriy hám áskeriy-texnikalıq baǵdarlarda – zamanagóy bilim hám tájiriybe almasıw, áskeriy taraw boyınsha sheriklikti pútkilley keńeytiw, birgelikte áskeriy oqıwlardı ótkeriw, regionallıq qáwipsizlikti támiyinlew baǵdarında bir qatar kelisimlerge eriskenin atap ótiw kerek, – delinedi Qorǵanıw ministrligi Málimleme hám ǵalaba kommunikaciyalar departamenti xabarında.
Ashılıw máresiminde atap ótilgenindey, bir neshe kúnge mólsherlengen oqıwdıń maqseti – mámleketler arasındaǵı isenimdi bekkemlew, áskeriy birge islesiwdi kúsheytiw, dúnyada barǵan sayın kúsheyip atırǵan geosiyasiy keskinlik hám krizisli jaǵdaylar, júzege kelip atırǵan jańa qáwip-qáterlerge zamanagóy shaqırıqlarǵa nátiyjeli qarsı turıwda tıǵız sheriklik baylanısların jáne de kúsheytiw bolıp esaplanadı.
Atap aytqanda, “Birlik – 2025” Regionallıq birgeliktegi oqıwında qatnasıwshılar házirgi zaman jawıngerlik tájiriybesinen kelip shıqqan halda urıs alıp barıwdıń eń nátiyjeli usılların qollanıw, uzaq aralıqlardaǵı nıshanlardı isenimli joq ete alatuǵın artilleriya, ushıwshısız ushıw apparatları, bronlı texnika hám basqa da qurallardıń imkaniyatlarınan paydalanıp, qoyılǵan oqıw-jawıngerlik wazıypanı birgelikte orınlaydı.
Sonday-aq, oqıw sheńberinde qatnasıwshılar jawıngerlik ónerdiń aldınǵı usıllarınan paydalanǵan halda jawıngerlik tayarlıq shınıǵıwları menen shuǵıllanıwı, hár qıylı jarıslarda qatnasıwı, máńgi Samarqand qalasına sayaxat etip, xalqımızdıń bay tariyxıy-ruwxıy miyrası, úrp-ádet hám dástúrleri menen jaqınnan tanısıwı názerde tutılǵan. Samarqandta Oraylıq Aziya mámleketleri hám Ázerbayjan Respublikası qorǵanıw ministrleriniń birinshi ushırasıwı ótkeriletuǵını da solardıń qatarına kiredi.

ÓzA