Elimizde keleshegimiz bolǵan jas óspirimler hám balalardıń tálim-tárbiyasına ayrıqsha itibar qaratılıp, mektep hám baqshalarda olar ushın zaman talaplarına say sharayatlardı jaratıwǵa bar múmkinshilikler iske qosılǵan. Bul baǵdardaǵı jumıslardı ámelge asırıwda ornatılǵan xalıqaralıq baylanıslar da óziniń unamlı nátiyjesin bermekte.

Qaraqalpaqstan Respublikasında Pedagogikalıq sheberlik orayında ǵalaba xabar quralları ushın media-tur shólkemlestirilip, onda usınday xalıqaralıq birge islesiwler nátiyjesinde UNICEF penen birgelikte shólkemlestirilgen bilimlendiriw orayı tanıstırıldı.
Ilaj dawamında junalistlerge qánigeler tárepinen mektepke shekemgi bilimlendiriw tarawın rawajlandırıw, pedagog kadrlardıń kásiplik potencialın arttırıw, sonday-aq, zamanagóy oqıw-metodikalıq processler tuwralı keń túrde maǵlıwmatlar berildi.
Sonday-aq, oraydaǵı úzliksiz kásiplik rawajlanıw kurslarınıń jolǵa qoyılıwı, sabaq processlerinde professor-oqıtıwshılar tárepinen qollanılıp atırǵan aldınǵı hám innovaciyalıq pedagogikalıq texnologiyalar, sonday-aq, tıńlawshılar ushın jaratılǵan zamanagóy oqıw ortalıǵı hám texnikalıq infrastrukturalar tuwralı maǵlıwmatlar da berilip, oraydaǵı oqıw xanaları, kompyuter klassları, laboratoriyalar hám zamanagóy texnologiyalar menen úskenelengen ámeliy shınıǵıw maydanları tanıstırıldı.
– Bilimlendiriw orayı ushın arnalǵan bólmelerdi hám klasslardı iri ońlawdan ótkeriw, úskenelew ushın jergilikli byudjetten 150 million, al UNICEF tárepinen 695 million sumlıq qarjı jumsaldı, – deydi oraydıń úlken oqıtıwshısı G.Baytilewova. – Tıńlawshılardıń interaktiv usılda bilim alıwı ushın barlıq qolaylı sharayatlar jaratıldı.
Oray UNICEF tárepinen usınıs etilgen zamanagóy texnikalıq úskeneler menen tolıq támiyinlengen bolıp, ol mektepke shekemgi bilimlendiriw sisteması xızmetkerleri ushın zárúr bolǵan teoriyalıq hám ámeliy sabaqlardı joqarı dárejede shólkemlestiriwge xızmet etpekte. Bul jerde muǵallimler jańa pedagogikalıq qatnaslardı ózlestirip, ótkerilip atırǵan sabaqlardıń sapasın arttırıw boyınsha zamanagóy kónlikpelerge iye bolmaqta.
– Men Taxtakópir rayonındaǵı 3-sanlı mektepke shekemgi bilimlendiriw shólkeminen kelip bul jerde mamanlıǵımdı artırıp atırman. Balalardı tárbiyalawdaǵı zamanagóy usıllar tuwralı maǵlıwmatlar alıp, óz-ara tájiriybe alısıp atırmız. Bilimlendiriw orayında barlıq sharayatlar jaratılǵan eken. Biz bunnan minnetdarmız, – deydi tıńlawshılardıń biri G.Orazbaeva.
Media-tur dawamında bunday baslamalardıń bilimlendiriwdiń sapasın arttırıwdaǵı áhmiyeti haqqında unamlı pikirler bildirilip, qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi