Ózbekstan Respublikası Prezidenti Shavkat Mirziyoev 15-oktyabr kúni Saudiya Arabstanınıń jetekshi kompaniyalarınıń basshıları menen ushırasıw ótkerdi.

Ilajda Patshalıqtıń investiciyalar ministri Xolid al-Falih, “ACWA Power”, “Al Muhaidib Group”, “Vision Invest”, “Data Volt”, “Riyadh Cables”, “AlMajdiah”, “InterHealth”, “Saudi Tabreed”, “AlBawani Holding”, “Miahona”, “Pemco” hám basqa da jetekshi kompaniya hám korporaciyaları qatnastı.
Ushırasıw aldınan Prezidentimiz eki mámleket basshılarınıń birgeliktegi háreketleri sebepli keyingi jıllarda Ózbekstan-Saudiya kóp tárepleme sheriklik qatnasıqları joqarı dárejege kóterilgenin ayrıqsha atap ótti.
Birgeliktegi joybarlardıń ulıwma portfeli 27 milliard dollardan arttı. Sonıń menen birge, usı jıldıń basınan berli elimizde Saudiyanıń 2 milliard dollarlıq investiciyaları ózlestirildi. Óz-ara sawda kólemi turaqlı artıp barmaqta. Aviaqatnawlar sanı háptesine 60 márteden arttı.
Búgin eki mámleket arasındaǵı nátiyjeli hám uzaq múddetli sherikliktiń jáne bir ayqın dálili bolǵan tariyxıy joybar – jańa Tashkent xalıqaralıq aeroportınıń qurılısına tırnaq tası qoyılatuǵını ayrıqsha atap ótildi.
– Ózbekstannıń ekonomikalıq transformaciyasına, onıń rawajlanıwına úlken úles qosıp atırǵan saudiyalı sheriklerimizdi biz bárqulla joqarı qádirleymiz, – dedi Prezident.
Soń Ózbekstan jetekshisi birge islesiwdi jáne de rawajlandırıwdıń tiykarǵı baǵdarların kórsetip, energetika tarawındaǵı joybarlar ayrıqsha áhmiyetke iye ekenin atap ótti.
Búgingi kúnde “ACWA Power” kompaniyası tárepinen mámleketimizde 15 milliard dollarlıq joybarlar, sonıń ishinde, aymaqlarda samal hám quyash elektr stanciyaların qurıw, “jasıl” vodorodtı rawajlandırıw joybarları ámelge asırılmaqta.
Bunday joybarlarda ózimizdiń islep shıǵarıwshılardıń ónimlerinen keńnen paydalanıw sanaatımız potencialınıń rawajlanıwına xızmet etedi.
Málimleme texnologiyaları hám jasalma intellekt tarawındaǵı birge islesiwdi bekkemlewge ayrıqsha itibar qaratıldı. “Data Volt” kompaniyası Tashkent qalasında zamanagóy maǵlıwmatlar orayın shólkemlestiriw joybarın tabıslı ámelge asırmaqta. Jańa Tashkent hám Buxarada usınday oraylardıń qurılısın, sonday-aq, Saudiya Arabstanı kompaniyalarınıń sanlı baslamalardaǵı qatnasın qollap-quwatlawǵa tayarlıq bildirildi.
Atap ótilgenindey, Ózbekstan volfram, molibden, magniy, litiy, grafit, titan hám basqa da strategiyalıq áhmiyetli paydalı qazılmalardıń úlken rezervlerine iye.
Tashkent hám Samarqand wálayatlarında “Keleshek metalları texnoparki” shólkemlestirilip, joqarı qosımsha qunlı ónimler islep shıǵarıw jolǵa qoyıladı.
Usı múnásibet penen mámleketimiz jetekshisi saudiyalı investorlardı geologiyalıq-izlew jumısların alıp barıw hám shiyki zattı qazıp alıwdan baslap, onı qayta islew hám tayar ónim islep shıǵarıwǵa shekemgi barlıq processlerdegi joybarlarda belsene qatnasıwǵa mirát etti.
Infrastruktura tarawında “Miahona” kompaniyası menen Ferǵana hám Jizzaq qalalarında aqaba suwlardı tazalaw, Qaraqalpaqstanda suw támiynatı sistemaların rawajlandırıw hám nasos stanciyaların modernizaciyalaw joybarları boyınsha tabıslı birge islesip atırǵanı atap ótildi.
Sonday-aq, “Saudi Tabreed” kompaniyası menen kommunallıq tarawdı rawajlandırıw boyınsha kelisimlerge erisildi.
Prezidentimiz Patshalıq kompaniyaların infrastrukturanı modernizaciyalaw hám xalıqtıń turmıs sapasın arttırıwǵa qaratılǵan jańa óz-ara paydalı joybarlarda belsene qatnasıwǵa shaqırdı.
Óz gezeginde, Saudiya Arabstanınıń jetekshi isbilermen toparlarınıń wákilleri Jańa Ózbekstannıń ekonomikalıq siyasatı, turaqlı ósiwi hám qolaylı investiciyalıq ortalıǵın joqarı bahalap, mámleketimizde óz-ara paydalı sheriklikti jáne de tereńlestiriw, anıq joybar hám baǵdarlamalardı alǵa qoyıw rejelerin bildirdi.

ÓzA