Awıl xojalıǵında jerden nátiyjeli paydalanıw hám belgilengen agrotexnikalıq talaplarǵa ámel etiw – hár bir fermerdiń tiykarǵı minneti bolıp esaplanadı. Bul tek ǵana ónimdarlıqtı arttırıw emes, al jer resursların qorǵaw, agrosanaat tarawında turaqlılıqtı támiyinlewge xızmet etedi. Sonlıqtan respublikamızda qadaǵalaw uyımları hám sud uyımları tárepinen bul talaplardı orınlamaǵan jaǵdaylar qatań tártipte kórip shıǵılmaqta.
Jınayat isleri boyınsha Shomanay rayonı sudında tergew sudyası J.Qdırniyazovtıń basshılıǵında “A.N” fermer xojalıǵınıń baslıǵı “S”ǵa baylanıslı hákimshilik is ashıq sud májilisinde kórip shıǵıldı.
Ózbekstan Respublikası Ministrler Kabineti janındaǵı Agrosanaat kompleksi ústinen qadaǵalaw inspekciyasınıń Shomanay rayonı bólimi tárepinen 2025-jıl 15-may kúni ótkerilgen tekseriwde, fermer xojalıǵında bir qatar nızambuzıwshılıq jaǵdayları anıqlanǵan.
Málim bolıwınsha, fermer xojalıǵınıń basshısı “S” tárepinen Ózbekstan Respublikası Jer kodeksiniń 40-statyası hám “Fermer xojalıǵı haqqında”ǵı Nızamnıń 17-statyası talapları buzılǵan.
Nızamǵa muwapıq, 2025-jıl ónimi ushın fermer xojalıǵında 20 gektar paxta, 6 gektar másh, 4 gektar gúnji, 3 gektar ot-jem hám 1 gektar dári ónimleri egiliwi kerek edi. Biraq tekseriw waqtına shekem jerdi tayarlaw hám egiw jumısları baslanbaǵanı anıqlanǵan. Sud májilisinde juwapker fermer belgilengen tártipte shaqırılǵanına qaramastan, ol qatnaspadı. Sud isti onıń qatnasıwısız kórip shıǵıp, onıń háreketlerin Hákimshilik juwapkershilik haqqındaǵı kodekstiń 65-statyası 3-bólimine muwapıq dep taptı.
Nátiyjede, sud qararına bola, fermer “S” 1 875 000 sum muǵdarında járiymaǵa tartıldı. Bul qarjı mámleket paydasına óndiriledi.
Sonday-aq, sud tárepinen ol 15 kún ishinde járiymanıń 50 procentin yamasa 30 kún ishinde 70 procentin ıqtıyarlı túrde tólese, qalǵan bólegi tólenbewi haqqındaǵı huqıqı túsindirildi.
Shomanay rayonı sudınıń bul qararı, jerden nátiyjeli paydalanıw, agrotexnikalıq talaplarǵa ámel etiw hám belgilengen nızamshılıq normalarına ámel etiw hár bir fermerdiń moynındaǵı juwapkershilik ekenin jáne bir márte kórsetti.
Jer – mámleket hám xalıq múlki. Onı durıs paydalanıw, óz waqtında egiw hám tárbiyalaw awıl xojalıǵında turaqlı rawajlanıw hám mámleket ekonomikasınıń bekkemligine xızmet etedi.

Qaraqalpaqstan xabar agentligi.