Ishki isler ministrligi akademiyasında kriminogen jaǵdayı quramalı máhálleler boyınsha videokonferencbaylanıs túrinde májilis ótkerildi.

Akademiya basshısı Rustam Hotamov basqarǵan májiliste Prezidentimizdiń máhállelerde jınayatshılıqtı saplastırıwdıń nátiyjeliligin arttırıwǵa qaratılǵan qararları tiykarında ámelge asırılıp atırǵan jumıslar hár tárepleme dodalandı.
Qaraqalpaqstan Respublikası, Buxara, Nawayı, Tashkent, Xorezm wálayatları hám paytaxtımız máhállelerine tartılǵan juwapkerlerdiń málimlemesi tıńlandı.
Atap ótilgenindey, tájiriybeli professor-oqıtıwshılardan ibarat jumısshı toparlar tárepinen máhállelerde qáwipsiz ortalıq jaratıw, huqıqbuzarlıqlardıń tiykarǵı faktorların anıqlaw hám erte aldın alıw, xalıqtıń tınısh turmısın támiyinlew baǵdarında mánzilli ilajlar ámelge asırılǵan.
Keyingi eki ay dawamında máhállelerdiń kriminogen jaǵdayına unamsız tásir kórsetip atırǵan 119 “jınayat oshaǵı” anıqlandı.
Jınayat júz beriwi múmkin bolǵan aymaqlarǵa 848 túrdegi zamanagóy kamera, 140 qáweter túymesi ornatılıp, 563 obekt texnikalıq qorǵawǵa alındı.
Máhállelerde 18 “qáwipsiz kóshe”, 39 “qáwipsiz úy” shólkemlestirildi. Huqıqbuzarlıqlardıń erte aldın alıw, bul baǵdarda shólkem hám mákemelerdiń juwapkershiligin arttırıw maqsetinde tiyisli shólkemlerge 177 usınıs xatı jiberildi.
Akademiya baslıǵı “Jol kartaları”nda belgilengen ilajlarǵa toqtap ótip, “ilimiy juwmaq – usınıs – nátiyje” principi tiykarında ilimiy tiykarlanǵan usınıslardı islep shıǵıwdı jedellestiriw zárúrligin atap ótti. Bunıń ushın “máhálle jetiligi” menen birgelikte úyme-úy júrip, hár bir mashqalanıń túp deregine jetip barıw, jınayatshılıqtı prognozlaw arqalı kriminogen faktorlardıń erte aldın alıw kerek.
Sın kózqaras ruwxında ótken májiliste jol qoyılǵan kemshilikler de aytıp ótildi. Juwapkerlerge tiyisli wazıypalardıń óz waqtında orınlanıwın támiyinlew, hár bir huqıqbuzarlıq, ásirese, aldın alıw múmkin bolǵan jınayatlar boyınsha ayrıqsha kózqaraslardı islep shıǵıw, “máhálle jetiligi” sistemasına metodikalıq járdem kórsetiw boyınsha tapsırmalar berildi.
Jumısshı toparlardıń jumısı máhálleniń kriminogen jaǵdayın turaqlastırıwda erisilgen nátiyjeler arqalı bahalanatuǵını aytıp ótildi.

N.Abduraimova, ÓzA