15-oktyabrden baslap pútkil respublikada tazalıq aylıǵı baslanadı. Aylıq dawamında barlıq máhálleler, mektep hám mektepke shekemgi bilimlendiriw mákemeleri, kósheler, elatlı punktler aymaqlarında tazalıq jumısları ámelge asırıladı.

Sonday-aq, volontyorlar, jas eko-aktivlerdiń qatnasıwında hár qıylı tazalıq akciyaları, ploggingler shólkemlestiriledi. Barlıq shólkemlerdiń basshıları, atap aytqanda, Ekologiya ministrliginiń basshıları bul ilajlarda jeke úlgi sıpatında belsene qatnasadı.
Bunnan tısqarı, házirgi waqıtta Ekologiya ministrligi, Bas prokuratura, Milliy gvardiya hám Ishki isler xızmetkerlerinen ibarat arnawlı shtablar shólkemlestirilmekte. Bul shtablar tárepinen hár bir wálayat, rayon hám qalalarda qatań ekologiyalıq qadaǵalaw ornatıladı hám jámiyetshilikke kúndelikli maǵlıwmat berip barıladı.
Qalaberdi, aylıq dawamında ekologiyalıq huqıqbuzarlıqlarǵa qarsı turaqlı reyd ilajları ámelge asırıladı. Ministrlik tárepinen respublikanıń barlıq aymaqlarına onlayn baqlaw kameraları ornatılǵan bolıp, bul kameralar qadaǵalawı jáne de kúsheytiledi.
Dıqqat! Ózbekstan Respublikası Prezidentiniń 2024-jıl 4-yanvardaǵı 5-sanlı Pármanına bola, aymaqlardı tazalawǵa juwapker bolǵan fizikalıq hám yuridikalıq tárepler óz wazıypaların orınlamaw nátiyjesinde qorshaǵan ortalıqtıń pataslanıwı ushın juwapkershilikke tartıladı. Belgilenbegen orınlarǵa shıǵındı taslaw Hákimshilik juwapkershilik haqqındaǵı Kodekstiń tiyisli statyalarına bola qatań juwapkershilikke sebep boladı!
Ekologiya ministrligi hámmeni tazalıq aylıǵına belsene qatnasıwǵa, dus kelgen jerge shıǵındı taslamawǵa, sergeklikke shaqıradı. Eger qorshaǵan ortalıqtı pataslandırıw menen baylanıslı huqıqbuzarlıqlarǵa gúwa bolsańız Ekologiya ministrliginiń (71) 207-11-07, (71) 207-11-08 telefon nomerleri, 1157, 1207 qısqa nomerleri yamasa @esogovuz_bot arqalı xabar beriń!

Qaraqalpaqstan xabar agentligi